კავკასიაში ახალი მედიაპლატფორმა - JAMnews-ი იწყებს მუშაობას, რომელიც სამხრეთ კავკასიაში მნიშვნელოვან მოვლენებს ხუთ ენაზე გააშუქებს (www.jam-news.net).

JAMnews-ი მიზნად ისახავს კავკასიაში მრავალფეროვანი კონტენტის გაშუქებას და რეგიონში მიმდინარე მოვლენების ანალიზს. ვებპორტალთან უკვე თანამშრომლობს 50-ზე მეტი ჟურნალისტი და უამრავი მოქალაქე რეპორტიორი კავკასიის მასშტაბით.

“JAMnews-ი არა მარტო უნიკალური ინფორმაციის მიღების, არამედ სოციალური კომუნიკაციის სივრცეცაა. გვჯერა, რომ ერთმანეთის უკეთ გაცნობა რეგიონის ქვეყნებს ბევრი, ხშირ შემთხვევაში საერთო პრობლემების დაძლევაში დაგვეხმარება. პროფესიონალ ჟურნალისტებთან და ანალიტიკოსებთან ერთად, ჩვენი ავტორი შეიძლება გახდეს ნებისმიერი, ვისაც საინტერესო ისტორია აქვს და მზადაა ის სხვებს გაუზიაროს”, აცხადებს პორტალის რედაქტორი საქართველოში სოფო ბუკია.

JAMnews-ი დააარსა მედიაორგანიზაცია “გოუ ჯგუფმა” სამხრეთ კავკასიაში უსაფრთხოებისა და სტაბილურობის ფონდის (South Caucasus Conflict Security and Stability Fund) მხარდაჭერით. “გოუ ჯგუფი” კავკასიაში შვიდი წელია მუშაობს და მედიის ხარისხის გაუმჯობესებისათვის სხვადასხვა პროექტს ახორციელებს.