აშშ-მა უკრაინის ოთხი რეგიონის უკანონო ანექსიის საპასუხოდ რუსეთს ახალი სანქციები დაუწესა.

შეერთებული შტატების სახაზინო დეპარტამენტის ინფორმაციით, სანქციების სამიზნე რუსეთის სამხედრო-სამრეწველო კომპლექსი გახდა. კერძოდ, ორი საერთაშორისო მიმწოდებელი კომპანია, რუსეთის ფინანსური ინსტიტუტების სამი ლიდერი, მათ შორის, ცენტრალური ბანკის ხელმძღვანელი ელვირა ნაბიულინა. „შავ სიაში“ მოხვდნენ რუსი მაღალჩინოსნების ოჯახის წევრები, მათ შორის სერგეი შოიგუს, დმიტრი მედვედევის, მიხაილ მიშუსტინის, ვალენტინა მატვიენკოს ოჯახები, ასევე რუსეთის 278 კანონმდებელი.

რუსეთის დიქტატორმა ვლადიმირ პუტინმა და სეპარატისტმა ლიდერებმა ხერსონის, ზაპოროჟიეს, დონეცკისა და ლუჰანსკის ოკუპირებული ტერიტორიების რუსეთის შემადგენლობაში შესვლის შესახებ „შეთანხმებებს“ ხელი დღეს მოაწერეს.