გადავდგებოდი [კალაძის ადგილას] - პირდაპირ გეუბნებით, იმიტომ, რომ მორალური და ზნეობრივი ძალა არ მეყოფოდა, - ამის შესახებ მთავარი არხის ეთერში განაცხადა "ნაციონალური მოძრაობის" ლიდერმა, ნიკა მელიამ ვაკის პარკში მომხდარ ტრაგედიაზე, რომელსაც 13 წლის მოზარდი ემსხვერპლა.

"ამ საკითხზე საუბარი მიჭირს... ნებისმიერი მშობელი შეიძლება ყოფილიყო იმ ტრაგიკულად დაღუპული ბავშვის მშობლების ადგილზე. მტკივნეულია, რბილად რომ ვთქვათ. ამ მძიმე წუთებში ხელისუფლებისგან სოლიდარობასაც კი ვერ გრძნობ. მაგრამ, უნდა ვისწავლოთ და ხელისუფლებას პასუხისმგებლობა ავაღებინოთ. არა ინფრასტრუქტურული პასუხისმგებლობა, არა სამეურნეო, არამედ პოლიტიკური პასუხისმგებლობა. დიახაც, უნდა მივაღწიოთ იმას, რომ კალაძე მიხვდეს. მიხვდეს, რომ ყველაფერი ვიცით, როგორ გამდიდრდა...

გადავდგებოდი [კალაძის ადგილას] - პირდაპირ გეუბნებით, იმიტომ, რომ მორალური და ზნეობრივი ძალა არ მეყოფოდა. საზოგადოების ნაწილი დამიჯერებს, ნაწილი არა. რაღაცას ხომ აქვს საზღვარი, ხალხო? ეს ყველაფერი კორუფციის შედეგია. კორუფცია კლავს, კორუფცია არის მოწიკწიკე ბომბია. ყველა გარემოში, პარკში და ყველა თითქოს, ერთი შეხედვით უსაფრთხო ადგილას ტრაგედიად იქცევა და შემთხვევით კი არ ხდება. კორუფცია ამას გულისხმობს - ხარისხი რომ იკლებს, ფულს რომ იპარავ. კორუფცია ლამაზად და დახვეწილად ჟღერს. ეს ხალხი ფულს იპარავს ჩვეულებრივად. ბათუმში რომ მრავალსართულიანი კორპუსი ჩამოინგრა კორუფციის შედეგად არ დატრიალდა ის ტრაგედია, როცა მშენებლობის ნებართვა მისცეს იქ სადაც არ უნდა მიეცათ? და კიდევ უამრავი ასეთი ნელფეთქებადი ბომბი გვაქვს შემოდგმული და როდის აფეთქდება არავინ იცის.

ამიტომ კალაძე უნდა მიხვდეს, რომ პოლიტიკური პასუხისმგებლობის აღება მან ტვირთად უნდა აიღოს. არ გამოვა რომელიმე რიგითი პროექტის განმახორციელებელზე ჯოხის გადატეხა, იმიტომ რომ მერიის შესაბამისი სამსახურები რამდენიმე რგოლი იბარებს პროექტს, შემდეგ რევიზიას ახორციელებენ, ამოწმებენ და წესით, ამ შემდეგ შედის ექსპლუატაციაში" - თქვა მელიამ.