„ნიუ ჰოსპიტალსის“ ბავშვთა ჯანმრთელობის ცენტრის ხელმძღვანელი დავით ციბაძე აცხადებს, რომ ვაკის პარკში დაშავებული ბავშვი ექიმებმა ხელოვნური სუნთქვის აპარატიდან მოხსნეს. მისივე თქმით, ბავშვი მშობლებთან უკვე შევიდა კომუნიკაციაში და ის დარჩება ინტენსიური მეთვალყურეობის ქვეშ.

ამასთან, დავით ციბაძე იმედოვნებს, რომ მას მალე გაწერენ.

„ამ წუთისთვის ბავშვის მდგომარეობა გაუმჯობესებულია, რაც გამოხატულია იმით, რომ მოიხსნა ფილტვის ხელოვნური ვენტილაციიდან. შემოდის კონტაქტზე. ის უკვე დაეკონტაქტა მშობლებს. რასაკვირველია, გარკვეული რისკები რჩება, თუმცა პირველი 24 საათის ის ყველაზე ცუდი, რაც შეიძლებოდა, რომ მომხდარიყო, ანოქსიური დაზიანება მეტნაკლებად დაძლეულია. ვიმედოვნებ, ძალიან მალე ლაზარე სახლში წავა. გართულებების საშიშროებები ჯერ ისევ რჩება, რადგან იქ იყო ასპირაცია. ჯერ არ გასულა 72 საათი და დარჩება ინტენსიური მეთვალყურეობის ქვეშ. სამედიცინო პერსონალის მხრიდან არ არის იმის არც ერთი მიზეზი, რომ ბავშვი სადმე გადავიყვანოთ“, – განაცხადა დავით ციბაძემ.