ვაკის პარკში მომხდარ ტრაგედიასთან დაკავშირებით, გრინსერვის+-ის დირექტორი, ლაშა ფურცხვანიძე  მესამედ გამოკითხეს. ჟურნალისტებთან საუბრისას მან კიდევ ერთხელ აღნიშნა, რომ შადრევანში სარეაბილიტაციო სამუშაოების მიმდინარეობისას, ასევე მისი დასრულების შემდეგაც ჩატარდა შემოწმებითი სამუშაოები.

ჟურნალისტის კითხვაზე, თუ რატომ იყო დამონტაჟებული წყალში 220 ვოლტიანი კვების ბლოკი, ფურცხვანიძემ აღნიშნა, რომ ეს ყველგან ასეა.

"შემოწმებული იყო ელექტროობა, შემოწმებული იყო დაინსტალირების დროსაც და მერეც... მე პასუხისმგებლობა ღმერთისგან უკვე მაქვს სიცოცხლის ბოლომდე და აწი რა პასუხიმგებლობა იქნება, სიმართლე გითხრათ, ამ ეტაპზე ნამდვილად არ მაინტერესებს".- ამბობს ფურცხვანიძე.

13 ოქტომბერს ვაკის პარკის შადრევანში სამ მოზარდს დენმა დაარტყა. მათგან ერთი, მარიტა მეფარიშვილი კლინიკაში მიყვანიდან მალევე გარდაიცვალა. ექიმის ცნობით, ის კლინიკაში გულის გაჩერებით შეიყვანეს.