რუსეთის ძალები დასავლეთ ხერსონიდან უკან დახევას განაგრძობენ და თავდაცვითი ბრძოლებისთვის ემზადებიან. ამის შესახებ ნათქვამია ომის შემსწავლელი ინსტიტუტის (ISW) ყოველდღიურ მიმოხილვაში.

უკრაინის გენშტაბის მონაცემებით, რუსეთის ძალებმა დატოვეს სოფლები ჩარივნოე და ჩკალოვო, ქალაქ ბერისლავიდან კი გაიყვანეს ოფიცრები და მედიკოსები. ხერსონი იქ დარჩენილი მოსახლეობის უმეტესმა ნაწილმა უკვე დატოვა.

მიმოხილვაში აღნიშნულია, რომ რუსეთის არმია ემზადება შემაკავებელი მოქმედებებისთვის: ნოვა კახოვკის საოკუპაციო ადმინისტრაციის ხელმძღვანელმა განაცხადა, რომ კახოვკის წყალსაცავში გაზარდეს წყლის დინება ნოვა კახოვკის ჰიდროელეტქროსადგურის კაშხლის დანგრევის შემთხვევისთვის.  მანამდე ISW-ში არაერთხელ განაცხადეს, რომ რუსმა სამხედროებმა უკან დახევის დროს, შესაძლოა, ააფეთქონ ჰიდროელექტროსადგურის კაშხალი, რაც რეგიონის დიდი ნაწილის დატბორვას გამოიწვევს.

22 ოქტომბერს, საოკუპაციო რეჟიმმა ხერსონის მოსახლეობას ქალაქის დატოვება უბრძანა „ფრონტზე დაძაბული ვითარების, ქალაქის მასირებული დაბომბვის საფრთხისა და ტერორისტული თავდასხმების გაზრდილი საშიშროების გამო“. ანალიტიკოსები აღნიშნავენ, რომ დაკავებული ტერიტორიების დატოვებისას, რუსეთი ცდილობს ამ ტერიტორიებიდან მოსახლეობა გაასახლოს, რაც გრძელვადიან პერსპექტივაში დამღუპველად იმოქმედებს უკრაინის გათავისუფლებული რეგიონების სოციალურ და ეკონომიკურ პოტენციალზე.

ამის გარდა, ინსტიტუტის ექსპერტები წერენ, რომ რუსეთის მასირებული დარტყმები უკრაინის ენერგეტიკის ობიექტების წინააღმდეგ, რომლებიც უკვე ორი კვირაა გრძელდება, ნაკლებსავარაუდოა, რომ გავლენას მოახდენს უკრაინელების გამარჯვების სურვილზე, თუმცა ეკონომიკური და ჰუმანიტარული თვალსაზრისით წარმოადგენს მზარდ საფრთხეს ცივი ზამთრის დადგომასთან დაკავშირებით.