რუსეთის თავდაცვის მინისტრმა სერგეი შოიგუმ 23 ოქტომბერს სატელეფონო საუბარი გამართა ნატოს სამი ქვეყნის თავდაცვის უწყებების ხელმძღვანელებთან. რუსეთის თავდაცვის სამინისტროს ცნობით, შოიგუმ სამივე კოლეგასთან გამოთქვა შეშფოთება უკრაინის მიერ ე.წ. „ბინძური ბომბის“ შესაძლო გამოყენებასთან დაკავშირებით.

შოიგუ ჯერ საფრანგეთის თავდაცვის მინისტრს სებასტიან ლეკორნოს ესაუბრა, შემდეგ თურქეთის მინისტრს ჰულუსი აკარს და ბოლოს ბრიტანეთის თავდაცვის მინისტრ ბენ უოლესს.

სატელეფონო საუბრებს წინ უძღოდა სახელმწიფო სააგენტო „რია ნოვოსტის“ მიერ გავრცელებული ინფორმაცია, რომ "კიევის რეჟიმი ამზადებს პროვოკაციას "ბინძური ბომბით".

ინფორმაციაში ნათქვამია, რომ უკრაინის ხელისუფლება, სავარაუდოდ, "ამზადებს პროვოკაციას თავისი ქვეყნის ტერიტორიაზე ე.წ. "ბინძური ბომბის" ან დაბალი წარმადობის ბირთვული იარაღის აფეთქებასთან დაკავშირებით", რომლის მიზანი, რუსული სააგენტოს მტკიცებით, რუსეთის დადანაშაულებაა მასობრივი განადგურების იარაღის გამოყენებაში.

საფრანგეთის თავდაცვის სამინისტროს მიერ გავრცელებულ პრეს-რელიზში ნათქვამია, რომ ქვეყნის თავდაცვის მინისტრმა სებასტიან ლეკორნომ მოისმინა შოიგუს საუბარი, უკრაინის მიერ თავის ტერიტორიაზე ე.წ. „ბინძური ბომბის“ შესაძლო გამოყენებასთან დაკავშირებით რუსეთის დადანაშაულების მიზნით“.

ინფორმაციაში აღნიშნულია, რომ პარიზი უარყოფს „ესკალაციის ნებისმიერ ფორმას, მათ შორის ბირთვულს“ და გამოთქვამს მზადყოფნას კონფლიქტის მშვიდობიანი გადაჭრისთვის იმუშაოს მოკავშირეებთან.

თურქეთის თავდაცვის უწყების ინფორმაციით, ჰულუსი აკარმა და შოიგუმ  "გაცვალეს ინფორმაციები და მოსაზრებები პროვოკაციებთან დაკავშირებით სიფრთხილისა და სიფხიზლის გამოჩენის აუცილებლობის შესახებ“.

დიდი ბრიტანეთის თავდაცვის სამინისტრომ აღნიშნა, რომ შოიგუსა და ბენ უოლესს შორის სატელეფონო საუბარი რუსული მხარის ინიციატივით შედგა.