მოლდოვის პრეზიდენტმა, მაია სანდუმ განაცხადა, რომ ქვეყანაში მოქმედი კორუმპირებული ძალები და რუსეთის სპეცსამსახურები მიზანმიმართულად ცდილობენ სიტუაციის არევას. ამის შესახებ მან რუმინულ მედიასთან ინტერვიუში ისაუბრა.

მისივე განცხადებით, ის პოლიტიკური პარტიები, რომლებმაც ახლა წამოიწყეს აქციები, რუსეთის სპეცსამსახურებთან ერთად ახდენენ დესტაბილიზაციას.

„ჩვენ გვაქვს მტკიცებულება, რომ კორუმპირებული ჯგუფების კოალიციას, რომელმაც მოლდოვაში ბევრი ფული მოიპარა, ასევე რუსეთის სპეცსამსახურებს, პრორუსულ პარტიებს – მათ ყველას მიზნად აქვთ მოლდოვის დესტაბილიზაცია. ისინი სათავისოდ იყენებენ იმ სირთულეებს, რომლებსაც მოქალაქეები აწყდებიან. ჩვენ შემართულები ვართ, დავიცვათ დემოკრატია“, – განაცხადა სანდუმ.

ბოლო რამდენიმე კვირის განმავლობაში, პარტია "შორი" მოლდოვაში აქტიურ ანტისამთავრობო აქციებს მართავს.