ნიკა გვარამიას განაჩენზე აშშ-ს საელჩოს განცხადება სასამართლოს დამოუკიდებლობაში პირდაპირი ჩარევა იყო, რაც, ბუნებრივია, ძალიან მძიმეა, - ამის შესახებ ქართული ოცნების თავმჯდომარემ, ირაკლი კობახიძე განაცხადა.

"ასეთი განცხადებები მე, რა თქმა უნდა, ცოტა მძიმედ უნდა შევაფასო. სასამართლოს დამოუკიდებლობაში ჩარევასა და მის გადაწყვეტილებებზე რაიმე ფორმით ზემოქმედებას ჩვენ არც ერთ შემთხვევაში არ ვკადრულობთ. ნიკა გვარამიას განაჩენზე აშშ-ს საელჩოს განცხადება სასამართლოს დამოუკიდებლობაში პირდაპირი ჩარევა იყო, რაც, ბუნებრივია, ძალიან მძიმეა. სხვა შეფასებას მე ამას ვერ მივცემ. ჩვენი პარტნიორები სამართლის უზენაესობასა და სასამართლოს დამოუკიდებლობას თანაბრად უნდა უფრთხილდებოდნენ როგორც საკუთარ ქვეყანაში, ასევე სხვა სახელმწიფოშიც. ჩვენ სასამართლოს დამოუკიდებლობასა და სამართლის უზენაესობას სხვანაირად ვუდგებით," - განაცხადა კობახიძემ.

აშშ-ს საელჩოს განცხადებით, ისინი სააპელაციო სასამართლოს გადაწყვეტილებაზე "მთავარი არხის" დირექტორის ნიკა გვარამიას პატიმრობაში დატოვების შესახებ ღრმა შეშფოთებას გამოხატავენ და ამბობენ, რომ გვარამიას მიმდინარე პატიმრობა რისკის ქვეშ აყენებს ქართველი ხალხის მკაფიო არჩევანსა და საქართველოს ლიდერების გაცხადებულ მიზანს - უფრო უსაფრთხო, დემოკრატიული, ევროპული მომავლისა.