გერმანული მედიის ინფორმაციით, საქართველოს მოქალაქის, ზელიმხან ხანგოშვილის მკვლელობისთვის გასამართლებულ რუსეთის მოქალაქეს, ვადიმ კრასიკოვს შესაძლოა, გაცვლისთვის ამზადებდნენ.

მედიის ცნობით, ოქტომბრის ბოლოს, ფარული მუქარის მიზეზით, ვადიმ კრასიკოვი ბერლინის ტეგელის მკაცრი რეჟიმის ციხიდან ბავარიაში გადაიყვანეს.

გავრცელებული ინფორმაციით, გერმანიის ხელისუფლება ამტკიცებდა, რომ კრასიკოვს საფრთხე ემუქრებოდა და შურისძიების ეშინოდა, რადგან ბერლინში ჩეჩნური წარმოშობის ბევრი ადამიანია დაპატიმრებული, მეორე ვერსიით კი, კრასიკოვი ეიზენჰუტენშტადტში "დეპორტირებულთა სპეციალური დაკავების ცენტრში" გადაიყვანეს.

მედია წერს, რომ ტეგელში გავრცელდა ჭორები იმის შესახებ, რომ კრასიკოვი რუსეთში უნდა გაეგზავნათ, ის პატიმრების გაცვლის ნაწილი იყო. ზაფხულში რუსეთმა წამოაყენა კრასიკოვის ექსტრადირების საკითხი აშშ-ის ორი მოქალაქის, ბრიტნი გრინერისა და პოლ უილანის სანაცვლოდ. მაშინ ბერლინის სასამართლომ ეს შუამდგომლობა განიხილა და უარყო.

საქართველოს მოქალაქე ზელიმხან ხანგოშვილი ბერლინში 2019 წლის 23 აგვისტოს მოკლეს. მას ველოსიპედით მიმავალმა ქილერმა ქუჩაში ესროლა. ხანგოშვილი ადგილზე გარდაიცვალა.

ეს ხანგოშვილზე მეორე თავდასხმა იყო. 2015 წლის 28 მაისს თბილისში ჩაცხრილეს ავტომობილი, რომელშიც ის იმყოფებოდა. ხანგოშვილი სერიოზულად დაიჭრა. მკურნალობის დასრულებისთანავე მან საქართველო დატოვა.

ზელიმხან ხანგოშვილი 2012 წელს საქართველო-რუსეთის საზღვართან მდებარე სოფელ ლაფანყურის სპეცოპერაციაში შუამავალი იყო. სწორედ ამ სპეცოპერაციას დაუკავშირეს ხანგოშვილის ახლობლებმა 2015 წელს მომხდარი თავდასხმა.

გენერალური პროკურორი ფორშნერი აცხადებად, რომ პოლიტიკურად მოტივირებული მკვლელობა რუსეთის სამთავრობო უწყებების ბრძანებით განხორციელდა და ვადიმ კრასიკოვი დაკავშირებული იყო რუსეთის უშიშროების ფედერალურ სამსახურთან.

ხანგოშვილის მკვლელობამ ბერლინსა და მოსკოვს შორის დიპლომატიური დაძაბულობა წარმოშვა.