აშშ-ს სახელმწიფო მდივნის, ენტონი ბლინკენის თქმით, უკრაინის მიერ ხერსონის გათავისუფლება უკრაინელი სამხედროებისა და ხალხის სიმამაცის დადასტურებაა.

ამის შესახებ ბლინკენმა კამბოჯაში, სამხრეთ-აღმოსავლეთ აზიის ქვეყნების სამიტზე ისაუბრა, როდესაც უკრაინის საგარეო საქმეთა მინისტრს, დმიტრო კულებას შეხვდა.

მისი თქმით, ხერსონის გათავისუფლება ასევე ცხადჰყოფს იმ დახმარების მნიშვნელობას, რომელსაც აშშ და მსოფლიოს სხვა ქვეყნები უკრაინას უწევენ რუსეთის აგრესიასთან ბრძოლაში.

ბლინკენის განცხადებით, კიევის სამხედრო, ჰუმანიტარული და ეკონომიკური მხარდაჭერა გაგრძელდება, ვიდრე ეს საჭირო იქნება.

აშშ-ის სახელმწიფო მდივანმა ასევე გააკრიტიკა რუსეთის სამხედროების სტრატეგია, რომლებიც უკრაინაში სამოქალაქო და მათ შორის ენერგეტიკული ინფრასტრუქტურის განადგურებას აგრძელებენ.

ბლინკენმა ხაზი გაუსვა იმასაც, რომ უკრაინის გადასაწყვეტია რუსეთთან მოლაპარაკების დრო და შინაარსი.