როდესაც ამერიკელ სენატორებს თავს ესხმის „ქართული ოცნება“, თავს ესხმის საკუთარ სახელმწიფოს და ქვეყნის თავისუფლებას - სამადაშვილი, - პირველი არხის ცნობით, ამის შესახებ „ლელოს“ წევრმა, სალომე სამადაშვილმა განაცხადა.

სამადაშვილის თქმით, დამოუკიდებლობისა და სახელმწიფოებრიობის განსამტკიცებლად, ქვეყნის მომავლისთვის მათი მხარდაჭერა გადამწყვეტია.

„ამერიკის შეერთებული შტატების სენატი პრეზიდენტთან ერთად, არის ამერიკის საგარეო პოლიტიკის მთავარი განმსაზღვრელი აქტორი. მათ შორის ის სენატორები, რომლებიც მოსმენაზე საუბრობდნენ, მრავალი წელია, ჩვენი ქვეყნის მხარდამჭერები არიან. მათი მხარდაჭერა გადამწყვეტია ჩვენი ქვეყნის დამოუკიდებლობისა და სახელმწიფოებრიობის განსამტკიცებლად, ნატო-ში მომავლისთვის და ზოგადად, ჩვენს ქვეყანაში თავისუფლების დასაცავად. როდესაც მათ თავს ესხმის „ქართული ოცნება“, თავს ესხმის არა ამერიკელ სენატორებს, არამედ საკუთარ სახელმწიფოს და ქვეყნის თავისუფლებას. ყველას გვესმის, რომ სწორედ ამერიკის შეერთებული შტატების მხარდაჭერა არის გადამწყვეტად და ფუნდამენტურად მნიშვნელოვანი ჩვენი სახელმწიფოებრივი ინტერესების დასაცავად იმ ურთულეს გეოპოლიტიკურ გარემოში, რომელშიც დღეს ცხოვრება გვიწევს“, – განაცხადა სალომე სამადაშვილმა.