მას შემდეგ, რაც "ქართულმა ოვნებამ" ბიძინა ივანიშვილის ლიდერობით, დაამსხვრია მახინჯი სისტემა, ჩვენ ევროინტეგრაციის გზაზე ყველაზე მეტი გავაკეთეთ - ღარიბაშვილი, – ამის შესახებ საქართველოს პრემიერ-მინისტრმა პარლამენტში განაცხადა, სადაც პრემიერს დღეს ინტერპელაციის წესით უსმენენ.

"მინდა, მანამდე ყველას შევახსენო, რომ მას შემდეგ, რაც 2012 წლის პირველ ოქტომბერს ის მახინჯი სისტემა, ფსევდოდემოკრატიული და რეალურად თავისი შინაარსით, გამოხატვის ფორმებით და მმართველობის სტილით იყო აბსოლუტურად დეგრადირებული, ავტოკრატიული, დიქტატორული რეჟიმი, მას შემდეგ, რაც ეს სისტემა დაამსხვრია „ქართულმა ოცნებამ“ ბიძინა ივანიშვილის ლიდერობით, ჩვენმა გუნდმა, დიდი სიამაყით უნდა აღვნიშნოთ, რომ ჩვენ ამ გზაზე, რომელსაც ჰქვია ევროინტეგრაციის გზა, ყველაზე მეტი გავაკეთეთ მას შემდეგ, რაც ქვეყანამ დამოუკიდებლობა აღიდგინა. მინდა, რამდენიმე კონკრეტული მაგალითი შევახსენო ჩვენს ოპონენტებს: პირველი მთავარი დოკუმენტი, რომელიც არის გზამკვლევი და სახელმძღვანელო, ეს გახლავთ ასოცირების ხელშეკრულება, რომელიც დაგვიანებით გადმოეცა საქართველოს სამი წლის დაგვიანებით. დაიწყო რეალურად მოლაპარაკებები წინა ხელისუფლებამ, ანუ ბატონი ვაშაძის და მისი თანაგუნდელების ხელისუფლებამ. ვიზალიბერალიზაციის სამოქმედო გეგმა მხოლოდ მას შემდეგ გადმოეცა საქართველოს, რაც ჩვენ მოვედით ხელისუფლებაში. ესეც დაგვიანებით დაიწყო წინა ხელისუფლებამ. რეალურად, ამ 10 წელიწადში ჩვენ მოვაწერეთ ხელი ასოცირების შეთანხმებას, თავისუფალ ვაჭრობას, უვიზო რეჟიმს და ახლა უკვე, ამ ახალი რეალობის გათვალისწინებით, დაჩქარდა რეალურად ჩვენ მიერ ისედაც გაცხადებული პროცესი. შევიტანეთ ევროკავშირის წევრობაზე განაცხადი და ქვეყანას მიენიჭა ევროპული პერსპექტივა“, – განაცხადა პრემიერმა.