„ლელოს“ ლიდერი მამუკა ხაზარაძე აცხადებს, რომ „ნაციონალურ მოძრაობას“ თუ დაუბრუნდებიან ისეთი რეაქციული ძალები, როგორიც, მაგალითად, ვანო მერაბიშვილია, მათთან თანამშრომლობის გაგრძელების პერსპექტივას ვერ ხედავს.

„პირველ რიგში, სხვა პარტიის შიდა საქმეები, მათი შიდა საქმეებია, ეს იქნება არჩევნები თუ ა.შ. თუმცა ჩვენ ვაკვირდებით ამ პროცესს, როგორც ყველა სხვა პარტია თუ მოქალაქე, რადგან მნიშვნელოვანი პროცესია ქვეყნის პოლიტიკურ ცხოვრებაში.

ჩვენ თუ დავინახავთ, რომ ამ პარტიას უბრუნდებიან ისეთი რეაქციული ძალები, როგორიცაა, მაგალითად, ვანო მერაბიშვილი და ა.შ. მე და ჩვენი პარტია ვერანაირ პერსპექტივას ვერ ვხედავთ მათთან თანამშრომლობის ან რაიმე ურთიერთობის გაგრძელების“, – აღნიშნა მამუკა ხაზარაძემ.

ვანო მერაბიშვილმა გუშინწინ სოციალურ ქსელში დაწერა: „23 ნოემბერი, 2003 წელი. ახლაც ზუსტად ისევე გავიმარჯვებთ, როგორც მაშინ“.