ევროკომისიის პრეზიდენტ ურსულა ფონ დერ ლაიენის მიმართვის ტექსტი, სადაც ის უკრაინაში დაღუპული შვიდობინი მოქალაქეებისა და უკრაინის არმიის დანაკარგის შესახებ საუბრობს, დარედაქტირდა. ამის შესახებ განმარტება გააკეთა ევროკომისიის პრესსპიკერის მოადგილე დანა სპინანტმა. მან აღნიშნა, რომ ურსულა ფონ დერ ლაიენის თადაპირველი მიმართვა შეიცავდა უზუსტობებს ციფრებში.

მისი თქმით, უკრაინის დანაკარგის შესახებ მოყვანილი მონაცემი გულისხმობდა მოკლულ და დაჭრილ უკრაინელ სამხედროებს.

"გამოყენებული შეფასება გარე წყაროებიდან ეხებოდა როგორც მოკლულებს, ისე დაშავებულებს და მიმართული იყო რუსეთის სისასტიკის საჩვენებლად“, – წერს დანა სპინანტი.

დღეს ურსულა ფონ დერ ლაიენმა გავრცელებულ მიმართვაში განაცხადა, რომ უკრაინამ რუსეთთან ომში 100 ათასი სამხედრო და 20 ათასი მშვიდობიანი მოქალაქე დაკარგა. მოგვიანებით, ევროკომისიის ვებგვერდზე ევროკომისიის პრეზიდენტის განცხადების ტექსტი დარედაქტირდა. ტექსტიდან ამოიღეს სამოქალაქო პირებისა და სამხედროების დანაკარგის შესახებ მონაცემები, ურსულა ფონ დერ ლაიენის „ტვიტერის“ ოფიციალურ გვერდზე კი ვიდეომიმართვის ახალი ვერსია დაიდო.