საექსპერტო დასკვნაში წერია, რომ ორგანიზმში აღმოჩენილია ვერცხლისწყალი, დარიშხანი, ბარიუმი. ამ სამ ნივთიერებაზეა საუბარი და აღწერს ექსპერტი რატომ, როგორ, რანაირად. ამბობს, რომ სააკაშვილი გადასაყვანია უცხოეთის კლინიკაში, რომ მოხდეს მისი დეტოქსიკაცია, ეს წერია საექსპერტო დასკვნაში, – ამის შესახებ მიხეილ სააკაშვილის ადვოკატმა, შალვა ხაჭაპურიძემ განაცხადა.

ხაჭაპურიძის თქმით, სწორედ აღნიშნულ საკითხზე დაიკითხება 22 დეკემბერს დაგეგმილ სასამართლო სხდომაზე უცხოელი ექსპერტი.

„ხვალ ბატონი სმიტი დაიკითხება, რომელიც გახლავთ ამერიკის ტოქსიკოლოგთა ასოციაციის წევრი“, – აღნიშნა ადვოკატმა.

ადვოკატი აცხადებს, რომ მისი დაცვის ქვეშ მყოფი მზად არის, ჩაიტაროს ანალიზები იმ შემთხვევაში, თუ ამისთვის უცხოელი ავტორიტეტული საექსპერტო ბიურო იქნება მოწვეული.

„ექსპერტიზას რაც შეეხება, ჩვენ მზად ვართ, ჩავუტაროთ ექსპერტიზა, თუმცა თუ გახარიამ შარდი არ ანდო სამხარაულის ექსპერტიზას, ჩვენ სისხლი თმა და ბიოფსია რატომ უნდა ვანდოთ? ჩატარდეს ანალიზები, ოღონდ ამისთვის სახელმწიფომ მოიწვიოს უცხოელი ავტორიტეტული საექსპერტო ბიურო და მზადა ვართ მივიღოთ მონაწილეობა. პენიტენციურს ვედავებით, რომ იქ მოხდა ამ ადამიანის ტოქსიკოლოგიური ფაქტი, იუსტიციის დაქვემდებარებით და სამხარაულს ჩავატარებინოთ ექსპერტიზა?“, – განაცხადა ხაჭაპურიძემ.