ქართული ოცნების დეპუტატი, რატი იონათამიშვილი ექსპრეზიდენტ მიხეილ სააკაშვილის შესაძლო მოწამვლასთან დაკავშირებით გავრცელებულ ინფორმაციას ეხმიანება

"მიხეილ სააკაშვილის მოწამვლაზე ნებისმიერი საუბარი არის ფალსიფიკაცია და სიცრუის ტირაჟირება. ამის არც ერთი ფაქტი და არგუმენტი არ არსებობს და ესეც მხოლოდ და მხოლოდ იმ მიზნითაა მოტივირებული, რომ ჩვენს ქვეყანაში, რამენაირად, კანონის უზენაესობა უზრუნველყოფილი არ იყოს. ყველამ უნდა იცოდეს, რომ მიხეილ სააკაშვილი არის ის დამნაშავე, რომელიც საკუთარ დანაშაულებს არ ინანიებს და შესაბამისად, ის კანონის სრული დაცვით აგებს პასუხს". - ამბობს იონათამიშვილი.

პენიტენციური სამსახურის სამედიცინო დეპარტამენტის ხელმძღვანელმა, მალხაზ ურთქმელიძემ თქვა, რომ ცენტრ ემპათიის მიერ გასაჯაროებული მიხეილ სააკაშვილის ტოქსიკოლოგიური კვლევის შედეგებით, არავითარი მოწამვლა არ დასტურდება. ურთქმელიძის განცხადებით, სააკაშვილის ორგანიზმში ტოქსიკური ნივთიერებები მომწამლავი რაოდენობით არ არის და ის ნორმის ფარგლებშია.