აშშ-ში 30-ზე მეტი ადამიანის სიცოცხლე ემსხვერპლა ძლიერ ყინვას, ქარიშხალს და თოვას. მედიაში მსხვერპლთა რაოდენობის შესახებ სხვადასხვა ცნობები ვრცელდება. CNN-ის ინფორმაციით, გასული კვირის ბოლოდან დაღუპულია 37 ადამიანი, ABC-ს მონაცემებით - 39, ხოლო NBC-ს ცნობით - 41.

მედიის ინფორმაციით, უამინდობის შედეგად მსხვერპლია კოლორადოს, ილინიოსის, კანზასის, კენტუკის, მიჩიგანის, მისურის, ნებრასკას, ნიუ იორკის, ოჰაიოს, ოკლაჰომას, ტენესისა და ვისკონსინის შტატებში. გარდაცვალების ყველზე მეტი შემთხვევა დაფიქსირდა ერის ტბის აღმოსავლეთ სანაპიროზე მდებარე ქალაქ ბუფალოსა და მის შემოგარენში. ცხედრები ნაპოვნია ავტომანქანებში, სახლებსა და ნამქრებში.

აშშ-ის მეტეოროლოგიურმა სამსახურმა სტიქიას "ისტორიული" უწოდა. ზოგიერთ რაიონში ჰაერის ტემპერატურა -48 გრადუსი იყო. არაერთ შტატში საგანგებო მდგომარეობა გამოცხადდა. სტიქიით გამოწვეული ავარიების გამო ენერგომომარაგების გარეშე დარჩა ათასობით ამერიკელი. გასული სამი დღის განმავლობაში გაუქმდა 12 ათასამდე ავიარეისი.