რუსეთმა ჰიპერბგერითი ფრთოსანი რაკეტებით, „ცირკონებით“ აღჭურვილი ფრეგატი ატლანტის ოკეანეში გაუშვა. ფრეგატის, სახელწოდებით „საბჭოთა კავშირის ფლოტის ადმირალი გორშკოვი“, გაშვების ცერემონიაში მონაწილეობდნენ რუსეთის პრეზიდენტი, ვლადიმირ პუტინი და ქვეყნის თავდაცვის მინისტრი, სერგეი შოიგუ.

ვლადიმირ პუტინის განცხადებით, ჰიპერბგერით ფრთოსან რაკეტა „ცირკონს“ მსოფლიოში ანალოგი არ აქვს.

"ხომალდი უახლესი ჰიპერბგერითი სარაკეტო სისტემით - ცირკონითაა აღჭურვილი, რომელსაც ანალოგი არ გააჩნია. ეს იარაღი საშუალებას მისცემს რუსეთს, საიმედოდ დაიცვას თავი პოტენციური გარე მტრისგან და დაგვეხმარება, ვემსახუროთ ჩვენი ქვეყნის ეროვნულ ინტერესებს". - თქვა პუტინმა.

შოიგუს თქმით, ცირკონებით შეიარაღებულ გემს როგორც ხმელეთზე, ისე ზღვაში მტრისთვის ზუსტი და ძლიერი დარტყმის მიყენება შეუძლია. მისი თქმით, ფრეგატი ატლანტისა და ინდოეთის ოკეანეებში, ასევე ხმელთაშუა ზღვაში იცურებს.