ევროპარლამენტმა მიიღო რეზოლუცია, რომელიც მსოფლიო თანამეგობრობას უკრაინის წინააღმდეგ რუსეთის აგრესიის დანაშაულების გამოსაძიებლად სპეციალური საერთაშორისო ტრიბუნალის შექმნისკენ მოუწოდებს.

ამის შესახებ სოციალურ ქსელ „ტვიტერში“ ევროპარლამენტის პრეზიდენტი რობერტა მეცოლა წერს.

„უკრაინის წინააღმდეგ რუსეთის ომის შედეგები უზარმაზარია. მოკლული არიან ბავშვები, ქალები, კაცები, ოჯახები დაყოფილია. საავადმყოფოები განადგურებული, სახლები დანგრეული. სკოლები ნანგრევებად ქცეული. დღეს ევროპარლამენტი გამოვიდა სპეციალური საერთაშორისო ტრიბუნალის სასწრაფოდ შექმნის მოწოდებით. ომის დამნაშავეები უნდა გასამართლდნენ. ახლა“, – წერს რობერტა მეცოლა.

დეპუტატებმა რეზოლუციაში ხაზგასმით აღნიშნეს, რომ სპეციალურმა ტრიბუნალმა პასუხისგებაში უნდა მისცეს არა მხოლოდ რუსეთის პრეზიდენტი ვლადიმერ პუტინი, არამედ ბელარუსის პრეზიდენტი ალექსანდრე ლუკაშენკო და ამავე ქვეყნების სამხედრო და პოლიტიკური ხელმძღვანელობა.

მათი განცხადებით, მზადება ტრიბუნალისთვის უნდა დაიწყოს დაუყოვნებლივ. ევროპარლამენტარებმა მოუწოდეს ევროკავშირის ინსტიტუტებს, განსაკუთრებით ევროკომისიასა და ევროპის საგარეო სამსახურს, ხელი შეუწყონ დროებითი ტრიბუნალის შექმნას.

ევროპარლამენტი მიიჩნევს, რომ სპეციალური ტრიბუნალის შექმნა შეავსებს დიდ ხარვეზს საერთაშორისო სისხლის სამართლის ინსტიტუციურ სტრუქტურაში და ის უნდა ეფუძნებოდეს სტანდარტებსა და პრინციპებს, რომლებიც ვრცელდება სისხლის სამართლის საერთაშორისო სასამართლოში.