კრემლი უარყოფს, რომ ვლადიმირ პუტინი ბორის ჯონსონს სარაკეტო დარტყმით ემუქრებოდა, როდესაც ის {ჯონსონი} დიდი ბრიტანეთის პრემიერ-მინისტრის პოსტს იკავებდა.

ამის შესახებ რუსეთის პრეზიდენტის პრესმდივანმა დმიტრი პესკოვმა განაცხადა.

„ის, რაც ბატონმა ჯონსონმა თქვა, სიმართლე არ არის, უფრო სწორად, ტყუილია. უფრო მეტიც, გეტყვით, რომ მან ან განზრახ იცრუა ან ეს გაუცნობირებლად მოუვიდა, ან შესაძლოა, ვერ გაიგო რაზე ელაპარაკებოდა მას პრეზიდენტი პუტინი“, - თქვა პესკოვმა.

პესკოვის თქმით, მან იცის რას ეხებოდა ორი ლიდერის საუბარი.

„კიდევ ერთხელ ოფიციალურად ვიმეორებ: ეს სიცრუეა. არანაირი რაკეტებით მუქარა არ ყოფილა. რუსეთის უსაფრთხოებასთან დაკავშირებული გამოწვევების შესახებ  საუბრისას პრეზიდენტი პუტინი ამბობდა, რომ თუ უკრინა ნატო-ში გაწევრიანდებოდა ან ჩვენ საზღვრებთან ნატო-ს ან ამერიკის რაკეტები განთავსდებოდა იმის მანიშნებელი იქნებოდა, რომ ნებისმიერი რაკეტა მოსკოვამდე რამდენიმე წამში მიაღწევდა“, - თქვა პესკოვმა.

ჯონსონმა BBC-ის დოკუმენტურ ფილმში „პუტინი დასავლეთის წინააღმდეგ განაცხადა, რომ პუტინი სატელეფონო საუბრის დროს სარაკეტო დარტყმით დაემუქრა. „რაღაც მომენტში ის {პუტინი} თითქოს დამემუქრა და მითხრა: „ბორის, არ მინდა რამე დაგიშავო, მაგრამ რაკეტით ამას მხოლოდ ერთი წუთი დასჭირდება“, ან რაღაც ამდაგვარი“, - თქვა ჯონსონმა.