ჩეხეთის ახლად არჩეული პრეზიდენტი პეტრ პაველი აცხადებს, რომ უკრაინა ომის დასრულებისთანავე ნატო-ს წევრი უნდა გახდეს.

ამის შესახებ მან BBC-თან ინტერვიუში განაცხადა.

პაველის თქმით, უკრაინა მორალურად და პრაქტიკულად მზად არის შეუერთდეს დასავლეთის ალიანსს ომის დასრულების შემდეგ.

„უკრაინის არმია ალბათ ყველაზე გამოცდილი არმია იქნება ევროპაში. უკრაინა იმსახურებს გახდეს დემოკრატიული ქვეყნების საზოგადოების ნაწილი“, - განაცხადა პაველმა.

BBC -ის დამაზუსტებელ შეკითხვაზე, ეხება ეს თუ არა ნატო-ს წევრობას, პაველმა უპასუხა: „მიმაჩნია, რომ მათ ეს ნამდვილად დაიმსახურეს“.

მან ასევე აღნიშნა, რომ ომის საბოლოო დასრულება მთლიანად რუსეთის ხელშია. „საჭიროა მხოლოდ პრეზიდენტ პუტინის ერთი გადაწყვეტილება, გაიყვანოს თავისი ძალები უკრაინიდან და ომი დასრულდება“, - განაცხადა ჩეხეთის პრეზიდენტმა.

მანამდე პაველმა დაადასტურა, რომ სლოვაკ კოლეგასთან ზუზანა ჩაპუტოვასთან ერთად უკრაინაში ვიზიტს 2023 წლის გაზაფხულზე გეგმავს.

ნატო-ს სამხედრო კომიტეტის ყოფილი თავმჯდომარე, გენერალი პეტრ პაველი ჩეხეთის ახალ პრეზიდენტად 28 იანვარს აირჩიეს.

პაველი პრეზიდენტის ფიცს 2023 წლის 9 მარტს დადებს და მილოშ ზემანს შეცვლის, რომელიც პრეზიდენტის პოსტზე ორი ვადით - ათი წლის განმავლობაში იმყოფებოდა.