ყველა უკრაინული დროშა, რომელიც საქართველოში აღმართულია ქართული დროშის გვერდზე, გამოხატავს მხარდაჭერას ქართველი ხალხისგან, არის სოლიდარობის დასტური, რომელიც ჩვენ გვაერთიანებს სისხლიანი ვლადიმირ პუტინის წინააღმდეგ, - ამისშ ესახებ საქართველოში უკრაინის საქმეთა დროებითმა რწმუნებულმა, ანდრეი კასიანოვმა ორბელიანების სასახლეში, უკრაინის ომის წლისთავისადმი მიძღვნილ ღონისძიებაზე განაცხადა.

„თქვენი და ჩვენი მტერი არის საერთო, ორივეს ერთი ოკუპანტი გვყავს, რომელიც არ ჩერდება და უტევს ჩვენს ქვეყნებს. ამიტომაც ყველა საერთაშორისო პლატფორმაზე ჩვენი ქვეყნები იღებენ საერთო პოზიციებს, რათა დაძლიონ რუსეთის პოზიცია, აღადგინონ საქართველოსა და უკრაინის ტერიტორიული მთლიანობა.

ქართველი მებრძოლები დგანან უკრაინელი ჯარისკაცების გვერდიგვერდ და აქტიურად იცავენ ქვეყანას, ხალხი, მთავრობა, საჯარო ადმინისტრაციები, კერძო სექტორი, საქართველოს ეკლესია უზრუნველყოფენ თავშესაფარს იმ ხალხისთვის, ვისაც მოუხდა საკუთარი ქვეყნის დატოვება. ეს გამოიხატება ჰუმანიტარული დახმარებითაც. ყველა უკრაინული დროშა, რომელიც საქართველოში აღმართულია ქართული დროშის გვერდით, გამოხატავს მხარდაჭერას ქართველი ხალხისგან, არის სოლიდარობის დასტური, რომელიც ჩვენ გვაერთიანებს სისხლიანი ვლადიმირ პუტინის წინააღმდეგ.

მსურს, ვისარგებლო შემთხვევით და გამოვხატო მადლიერება პირადად სალომე ზურაბიშვილის მიმართ, მისი პრინციპული, უდრეკი პოზიციისა და დახმარებისათვის, რომელიც გამოხატავს უკრაინელი ხალხის მიმართ მხარდაჭერას. თქვენი სიტყვები და გამოსვლები, ქალბატონო პრეზიდენტო, არის ყველა უკრაინელისთვის იმ მეგობრობის სიმბოლო, რომელიც უკრაინელ ხალხსა და საქართველოს აკავშირებს. ეს არის ზუსტად იმის გამოხატულება, რაც ახლახან უკრაინის პრეზიდენტმა, ვოლოდიმირ ზელენსკიმ შეგვახსენა, რატომ გააგრძელებს უკრაინა ძლიერ პოზიციაზე ყოფნას და არ გაჩერდება, ვიდრე ბოლო ოკუპანტი არ დაემხობა. დიდება საქართველოს, დიდება უკრაინას“, – განაცხადა ანდრეი კასიანოვმა.