დემოკრატიის კვლევის ინსტიტუტის (DRI) განცხადებით,  საპარლამენტო უმრავლესობის მიერ ინიციირებული კანონპროექტის „უცხოური გავლენის გამჭვირვალობის შესახებ“ განხილვის გაპროტეტსების დროს, სამართალდამცავებმა უხეშად დაარღვიეს და არაპროპორციულად შეზღუდეს საქართველოს მოქმედი კანონმდებლობით გარანტირებული შეკრებისა და გამოხატვის უფლება.

ამასთან, DRI მოუწოდებს საქართველოს პარლამენტს, უარი თქვას უცხოური გავლენის აგენტების შესახებ კანონის განხილვაზე

 „2 მარტს, საზოგადოებრივი ორგანიზაციების და მედიის წარმომადგენლები და სამოქალაქო აქტივისტები საპარლამენტო უმრავლესობის მიერ ინიციირებული კანონის პროექტის „უცხოური გავლენის გამჭვირვალობის შესახებ“ განხილვას აპროტესტებდნენ. 

სამართალდამცავებმა უხეშად დაარღვიეს და არაპროპორციულად შეზღუდეს საქართველოს მოქმედი კანონმდებლობით გარანტირებული შეკრებისა და გამოხატვის უფლება - აქციის მონაწილეები და მედიის წარმომადგენლების დაკავება მას შემდეგ დაიწყო, რაც შეკრებილებმა საკანონმდებლო ორგანოს მიმდებარე ქუჩაზე გადაინაცვლეს და მმართველი პოლიტიკური ძალის წარმომადგენლებისთვის სირცხვილის დერეფნის მოწყობა დააანონსეს.

DRI მოუწოდებს:

საქართველოს პარლამენტს

უარი თქვას უცხოური გავლენის აგენტების შესახებ კანონის განხილვაზე.

შინაგან საქმეთა სამინისტროს

დარჩეს კანონის ფარგლებში და დაიცვას შეკრებისა და გამოხატვის თავისუფლება.

უარი თქვას ჟურნალისტური საქმიანობის შეუფერხებლად განხორციელებისთვის მიზანმიმართულად ხელის შეშლაზე. 

სპეციალურ საგამოძიებო სამსახურს

დაუყოვნებლივ შეისწავლოს და მოახდინოს სათანადო რეაგირება 2023 წლის 2 მარტს საქართველოს პარლამენტის მიმდებარე ტერიტორიაზე ჟურნალისტებისა და აქციის მონაწილეთა დაკავების ფაქტებზე და შეამოწმოს სამართალდამცავთა ქცევის სამართლებრივი საფუძველი და კანონიერება“, - ნათქვამია განცხადებაში.