პრეზიდენტის განცხადებები საკმაოდ უხეში იყო, პარლამენტში მოსვლამდე მაინც შეეძლო, თავი შეეკავებინა, პარლამენტის ტრიბუნა საშუალებას მისცემს, თავისი დამოკიდებულება ჩამოაყალიბოს, - ამის შესახებ პარლამენტის პირველმა ვიცე-სპიკერმა გია ვოლსკიმ განაცხადა.

ვოლსკის თქმით, პრეზიდენტი ხშირად საკონსტიტუციო უფლებამოსილებებიდან გადის.

„მიდგომათა დაპირისპირება სერიოზულად არის ექსპლუატირებული საზოგადოებაში, მედიასაშუალებებში და სპეკულაციის საგნად იქცა, მაგრამ თუ პოზიტიური მხრიდან შევაფასებთ პრეზიდენტის პარლამენტში მოსვლას, ეს არის კიდევ ერთი შესაძლებლობა ჩვენი საზოგადოებისთვის, პოზიციები დაინახოს, ზუსტად შეაფასოს და ჩამოყალიბდეს, ინფორმაციული ბაზის საფუძველზე მიიღოს გადაწყვეტილებები, როცა არჩევნების დრო მოვა.

წინასწარი განცხადებები საკმაოდ უხეში, დაუბალანსებელი იყო და პარლამენტში მოსვლამდე მაინც შეეძლო, თავი შეეკავებინა თავისი ხედვების გახმოვანებისგან. პარლამენტის ტრიბუნა მას საშუალებას მისცემს, თავისი დამოკიდებულება ჩამოაყალიბოს პროცესების მიმართ, რომლებიც ქვეყანაში მიმდინარეობს. ხშირ შემთხვევაში, პრეზიდენტი გადის საკონსტიტუციო უფლებამოსილებებიდან და ამ საკითხებთან მიმართებაშიც ალბათ საინტერესო იქნება სხვადასხვა მოსაზრების მოსმენა“, – განაცხადა გია ვოლსკიმ.