უკრაინის საგარეო საქმეთა სამინისტრო რუსეთის მიერ ოკუპირებულ ზაპოროჟიეს ატომურ ელექტროსადგურზე შესაძლო თავდასხმის მომზადების ფონზე საერთაშორისო საზოგადოებას რეაგირებისკენ მოუწოდებს.

უწყება აღნიშნავს, რომ რუსეთი ზაპოროჟიეს ატომური ელექტროსადგურის ოკუპაციით უხეშად არღვევს საერთაშორისო სამართალსა და ბირთვული უსაფრთხოების სტანდარტებს, მათ შორის ატომური ენერგიის საერთაშორისო სააგენტოს ფუნდამენტურ პრინციპებს ბირთვულ უსაფრხოებასთან დაკავშირებით.

„რუსეთმა, როგორც ტერორისტულმა სახელმწიფომ, დაარღვია, ბირთვული უსაფრთხოების შესახებ ყველა საერთაშორისო სამართალი და სახელშეკრულებო ვალდებულებების უმეტესობა, თუმცა ამ დრომდე არ უგრძვნია თავისი დანაშაულების სამართლიანი შედეგები“,- აღნიშნულია უწყების განცხადებაში.

უკრანის საგარეო საქმეთა სამინისტრო საერთაშორისო საზოგადოებას მოუწოდებს რუსეთი აღიაროს ტერორისტ სახელმწიფოდ.

 უწყება ასევე მიმართავს საერთაშორისო საზოგადოებას, განსაკუთრებით „დიდ შვიდეულსა“ და ევროკავშირს, მიიღონ სასწრაფო ზომები ზაპოროჟიეს ატომურ ელექტროსადგურზე ბირთვული კატასტროფის თავიდან ასაცილებლად.

შეგახსენებთ, მანამდე უკრაინის პრეზიდენტმა, ვოლოდიმირ ზელენსკიმ განაცხადა, რომ დაზვერვის ინფორმაციით, რუსეთი, სავარაუდოდ, ემზადება ტერორისტული თავდასხმისთვის ზაპოროჟიეს ატომურ ელექტროსადგურზე, რამაც, შეიძლება, გამოიწვიოს რადიაცია.