გადავდოთ საკითხის განხილვა ინტერპელაციის შემდეგ და ვმობილიზდეთ, რომ შეიქმნას ერთიანი ძალებით საგამოძიებო კომისია. ამ მომენტში, უდავოდ გამოჩნდება რეალურად რა სურს გახარიას, დანაშაულის გამოძიება, თუ დანაშაულის დაფარვა "ოცნებასთან" ერთად, - ამის შესახებ ფრაქცია "ერთიანი ნაციონალური მოძრაობის" თავმჯდომარე თინა ბოკუჩავამ განაცხადა.

მისი თქმით, შოვში მომხდარ სტიქიასთან დაკავშირებით საგამოძიებო კომისიის შექმნის საკითხზე "ქართულმა ოცნებამ" ისევ პროცედურული ომის გზა აირჩია. 

მისი თქმით, ფრაქცია "საქართველოსთვის" დამატებით დროს ითხოვს შს მინისტრის ინტერპელაციის პროცედურამდე, რომელიც თვის ბოლოს უნდა ჩატარდეს.  ბოკუჩავას განცხადებით, საგამოძიებო კომისიის შექმნის განხილვა და კენჭისყრაზე დაყენება გადაიწევა და დაელოდებიან გიორგი გახარიას პარტიის პოზიციას.

"ვფიქრობ, რომ ეს არის საკითხი, რომელიც ადამიანების სიცოცხლეს ეხება და ეს არის საკითხი, სადაც ოპოზიციამ აუცილებლად უნდა შეძლოს კონსოლიდაცია. ამიტომ, კეთილი, დაველოდოთ ამ ოპოზიციურ ფრაქციას, გადავდოთ საკითხის განხილვა ინტერპელაციის შემდეგ, ეს არის ოქტომბრის პირველი კვირა და ვმობილიზდეთ ყველა იმისთვის, რომ შეიქმნას ერთიანი ძალებით საგამოძიებო კომისია. ამ მომენტში, უდავოდ გამოჩნდება რეალურად რა სურს გახარიას, დანაშაულის გამოძიება, თუ დანაშაულის დაფარვა "ოცნებასთან" ერთად", - თქვა ბოკუჩავამ.

ბოკუჩავას განცხადებით, მანამდე შეხვდებიან ექსპერტებს, მოუსმენენ პარლამენტში შს მინისტრს და ირაკლი ღარიბაშვილს. მისივე თქმით, გეგმავენ შოვში ჩასვლასაც და ყველა ოპოზიციურ პარტიას, ასევე, პარლამენტის თავმჯდომარეს მოუწოდებს შეუერთდნენ.

"ვთავაზობ მოძალადე და ყველაფრისმკადრებელ პაპუაშვილსაც კი, შემოგვიერთდეს და წამოვიდეს შოვში და ამჯერად ბახილების გარეშე. ჩვენი მიზანია სიმართლის დადგენა და ჩვენ ყველა საპარლამენტო ბერკეტის გამოყენებით ვიბრძოლებთ ამ სიმართლისთვის", - განაცხადა ბოკუჩავამ.