აშშ-ის სახელმწფო მდივანმა ჯონ კერიმ მოსკოვში ვიზიტისას რუსეთის ხელისუფლებას ნადეჟდა სავჩენკოს უკრაინაში დაბრუნებისკენ მოუწოდა. კერიმ ამის შესახებ მოსკოვში რუსეთის პრეზიდენტთან ვლადიმერ პუტინთან მოლაპარაკებების შემაჯამებელ პრესკონფერენციაზე ისაუბრა.

”ეს ჰუმანიტარული ხასიათის საკითხია, ის დაუყოვნებლივ უნდა გადაიჭრას”, - განაცხადა კერიმ. მისი თქმით, ვლადიმერ პუტინმა მიანიშნა, რომ ”განსაზღვრულ მომენტში” მხარეებმა შესაძლოა უკრაინელი მფრინავის გათავისუფლების საკითხზე იმსჯელონ.

22 მარტს რუსეთის სასამართლომ ნადეჟდა სავჩენკოს 22-წლიანი პატიმრობა მიუსაჯა. ის რუსი ჟურნალისტის მკვლელობაში დაადანაშაულეს. სავჩენკო ბრალდებას კატეგორიულად უარყოფს.

ჯონ კერიმ და რუსეთის პრეზიდენტმა შეხვედრზე სირიის კრიზისიც განიხილეს.

როგორც რუსეთის საგარეო საქმეთა მინისტრმა სერგეი ლავროვმა პრესკონფერენციაზე განაცხადა, მხარეები სირიაში ცეცხლის შეწყვეტის რეჟიმის განმტკიცებისთვის კოორდინირებულ ქმედებებზე შეთანხმდნენ.

ჯონ კერიმ დადებითად შეაფასა ვაშინგტონსა და მოსკოვს შორის სირიის საკითხზე მიღწეული შეთანხმებები.

”შევთანხმდით სირიის გარდამავლი მთავრობის შექმნისა და ამ ქვეყნის კონსიტუციის შექმნის პროექტის ვადებზე. ეს პროცესები მიმდინარე წლის აგვისტოში უნდა დასრულდეს”, - განაცხადა აშშ-ის სახელმწიფო მდივანმა.