ქვემო ქართლის რეგიონის სასწრაფო დახმარების ცენტრს სამედიცინო და კომპიუტერული ინვენტარი გადაეცა. ახალი მოწყობილობების გამოყენებისთვის, მედპერსონალს ჩაუტარდა შესაბამისი ტრენინგიც. ინვენტარის გადაცემისა და პერსონალის სწავლების პროცესს სასწრაფო სამედიცინო დახმარების ცენტრის დირექტორი დავით ტორუა, რუსთავის მერის მოადგილე ნოდარ შეროზია და ქვემო ქართლის გუბერნატორი პაატა ხიზანაშვილი დაესწრნენ.
გადაუდებელი დახმარებისთვის აუცილებელი 20-მდე დასახელების სამედიცინო ინვენტარი, მათ შორის დეფიბრილატორები, კარდიოგრაფები, პორტატული პულსოქსიმეტრები, ხერხემლის საიმობილიზაციო და სატრაქციო, ასევე ზემო კიდურის უნივერსალური არტაშნები, კომბინირებული საინტუბაციო მილები, მექანიკური მქაჩები, ჟანგბადის პორტატული ბალონები, პედიატრიული უნივერსალური კისრის საყელოები, სამედიცინო ჩანთები, ოროფარინგიალური მილები, ჟანგბადის რეზერვუარიანი ნიღბები და სისტემა-დოზიმეტრები სასწრაფოს ყველა ეკიპაჟში დამონტაჟდება.

კომპიუტერული მოწყობილობების გადაცემის შედეგად, რაიონულ სამსახურებში ჩაირთვება ცენტრის ელექტრონული პროგრამაც, სადაც აღირიცხება თანამშრომლების მორიგეობის გრაფიკი და სამედიცინო სახარჯი მასალის რაოდენობა.

რეგიონული სასწრაფო სამედიცინო დახმარების ახალი ინვენტარით აღჭურვა მიმდინარე წლის 9 მარტს დაიწყო. სამედიცინო მოწყობილობები უკვე გადაეცა იმერეთის, კახეთის, აჭარისა და სამეგრელო-ზემო სვანეთის რეგიონებს.