”ისლამური სახელმწიფოს” ძალები თავდაცვის რეჟიმზე გადავიდნენ, მათი პოზიციები ერაყსა და სირიაში უფროდაუფრო სუსტდება. ამის შესახებ აშშ-ის პრეზიდენტმა ბარაკ ობამამ ცენტრალური დაზვერვის სამმართველოს შტაბ-ბინაში გამოსვლისას განაცხადა.

მისი თქმით, კოალიციამ აშშ-ის ხელმძღვანელობით ”ისლამური სახელმწიფოს” მებრძოლთა რაოდენობა ორი წლის განმავლობაში მინიმუმამდე შეამცირა.

”ყოველ დილით ”ისლამური სახელმწიფოს” ლიდერები იღვიძებენ და აცნობიერებენ, რომ ის შესაძლოა მათთვის უკანასკნელი აღმოჩნდეს”, - განაცხდა ობამამ.

”ისლამური სახელმწიფო” სირიის ტერიტორიაზე ცეცხლის შეწყვეტის რეჟიმს არ ექვემდებარება. ცეცხლის შეწყვეტის რეჟიმის ძალაში შესვლის მომენტიდან ქვეყნაში ძალადობის დონე მნიშვნელოვნად შემცირდა, თუმცა ადამიანის უფლებების დარღვევის შესახებ ინფორმაციები ყოველდღე ვრცელდება.  

მარტში სირიის არმიამ რუსეთის სამხედრო ავიაციის დახმარებით უძველესი ქალაქი პალმირა გაათავისუფლა. ერაყში სამთავრობო ჯარებმა საერთაშორისო კოალიციის დახმარებით ქალაქ მოსულის გასათავისუფლებად მასშტაბური ოპერაცია დაიწყეს.

სირიის ქალაქ რაქას, რომელსაც ჯიხადისტები თავიანთ დედაქალაქს უწოდებენ, კვლავ ”ისლამური სახელმწიფო” აკონტროლებს.