„რესპუბლიკური პარტიის“ ერთ-ერთი ლიდერის, დავით ბერძენიშვილის განცხადებით, არჩევნების თარიღთან დაკავშირებით ,,რესპუბლიკელების” პოზიცია თანამდებობების საკითხს არ უკავშირდება. მისი თქმით, თანამდებობებიდან გადადგომის საკითხს პარტიაში გადაწყვეტენ.

„რესპუბლიკელ მინისტრებთან დაკავშირებით, რუსთავი 2-ს და, როგორც ჩანს, პრეზიდენტის ადმინისტარციასაც ძალიან უცნაური ვერსია ჰქონდათ. თუ ვინმეს ჰგონია, რომ არჩევნების თარიღთან დაკავშირებით ჩვენი პოზიცია თანამდებობების საკითხს უკავშირდება, ეს ასე არ არის, რადგან თუ პრემიერმა შესაბამის აქტს ხელი არ მოაწერა, არჩევნები მაისში ვერ ინიშნება. მეორე მხრივ კი, ჩვენი მინისტრები მთავრობაში მაისამდე იქნებიან, ივნისამდე თუ აგვისტომდე, ამას ჩვენ თვითონ ვწყვეტთ“,-აღნიშნა ბერძენიშვილმა.

მისივე თქმით, არჩვნებთან დაკავშირებით სიმართლე პრემიერის და მთავრობის მხარესაა.

„პრეზიდენტმა კი თქვა, თუ ბიუჯეტში საკმარისი ფული არ არის, ჩემი ფონდიდან დავაფინანსებო, მაგრამ პრეზიდენტის ფონდიც ბიუჯეტისაა და ეს ფული პრეზიდენტის პირადი ფული არ არის. პრემიერი სწორად მოიქცა, როცა პრეზიდენტს ხელი არ მოუწერა, რადგან არჩევნებამდე 6 თვით ადრე არც მედია ჩააყენა მძიმე მდგომარეობაში და არც ბიუჯეტი არ გაფლანგა. როცა პრეზიდენტის წინააღმდეგ ხმალამოღებული ლაშქრობა მიდიოდა, “რესპუბლიკური პარტია” პრეზიდენტის ინსტიტუტს ყოველთვის იცავდა“, - აღნიშნა დავით ბერძენიშვილმა.