აშშ-ის პრეზიდენტი ბარაკ ობამა ჰიროსიმას მემორიალურ კომპლექსს ეწვევა. ამის შესახებ ამერიკის მთავრობის წყაროზე დაყრდნობით იაპონური გამოცემა Nikkei წერს.

აღნიშნულია, რომ ჰიროსიმაში ობამას ვიზიტი ”შვიდეულის” სამიტის შემდეგ შედგება, რომელიც იაპონიაში მაისის ბოლოს უნდა გაიმართოს. ეს ინფორმაცია ოფიციალურად არც იაპონურ და არც ამერიკულ მხარეს ჯერ არ დაუდასტურებია.

აპრილში ჰიროსიმას მშვიდობის პარკს ამერიკის ხელისუფლების წარმომადგენელი პირველად ეწვია. აშშ-ის სახელმწიფო მდივანმა ჯონ კერიმ ამ ისტორიული ვიზიტის დასრულებისას აღნიშნა, რომ ”არასდროს დაივიწყებს იმას, რაც იქ ნახა”.

1945 წლის აგვისტოში ამერიკელმა მფრინავებმა ატომური ბომბები ჩაყარეს იაპონიის ქალაქებში - ჰიროსიმასა და ნაგასაკში. აფეთქებების შედეგად ჰიროსიმაში 140, ნაგასაკში კი - 74  ათასი ადამიანი დაიღუპა. ატომური დაბომბვის მსხვერპლთა უმეტესობა მშვიდობიანი მცხოვრები იყო. ეს კაცობრიობის ისტორიაში დღემდე  ბირთვული იარაღის გამოყენების პირველი და უკანასკნელი შემთხვევააა.

ამ დრომდე ჰიროსიმასა და ნაგასაკში ამერიკის არცერთი ლიდერი არ ჩასულა.