შინაგან საქმეთა სამინისტროს ყოფილ მაღალჩინოსანს, ლევან გვაზავას სასამართლომ 10 ათას ლარიანი გირაო შეუფარდა. მოსამართლემ აღკვეთის ღონისძიების შეფარდებაზე დღეს იმსჯელა. პროკურატურა ლევან გვაზავასთვის20 ათასი ლარის გირაოს შეფარდებას ითხოვდა.

დაცვის მხარე მიღებულ გადაწყვეტილებას არ ეთანხმება და შესაძლოა ის გაასაჩივრონ. თავად ბრალდებულმა ლევან გვაზავამ კომენტარი სხდომის დაწყებამდე გააკეთა. მისი თქმით, მომხდარი ფაქტი მისი და მისი ოჯახის ტრაგედიაა და მისთვის არ აქვს მნიშვნელობა თუ რა ბრალს წაუყენებს მას პროკურატურა და რა გადაწყვეტილებას გამოიტანს სასამართლო.

„არ ვიცი ასე უცბად რატომ გადაწყვიტეს, თუ სურთ ამის გამოყენება, ეს უკვე მარტო ჩემი არა, მათი ტრაგედიაც არის, რომ სხვისი უბედურება რაღაცაზე გამოიყენონ, ეს მომენტი არ არის ჩემთვის მნიშვნელოვანი,“ - განაცხადა ლევან გვაზავამ.

საქმე ეხება შემთხვევას, რომელიც თბილისის მახლობლად ოქროყანაში შარშან 28 აგვისტოს მოხდა. ამ დღეს გარდაიცვალა გვაზავას ნათესავი რევაზ კალომლეწავი, ლევან გვაზავამ კი თვითმკვლელობა სცადა.  

წინა სასამართლო სხდომა მოსამართლემ 2 ივნისს ჩანიშნა.