ქართველი ერის ბედი მერაბიშვილსა და უგულავაზე დამოკიდებული არაა, - განაცხადა საპარლამენტო უმრავლესობის ლიდერმა ზვიად კვაჭანტირაძემ ევროპის სახალხო პარტიის წევრის, იაცეკ საირუშ ვოლსკის ბრიუსელში გაკეთებულ განცხადების საპასუხოდ. საირუშ ვოლსკის თქმით, საქართველოში უვიზო რეჟიმის ამოქმედებამდე ივანე მერაბიშვილი და გიგი უგულავა უნდა გათავისუფლდნენ. ამასთან, ვოლსკი საქართველოსგან "რუსთავი 2-თან დაკავშირებით სამართლიანი გადაწყვეტილების მიღებას" ელის.

“საქართველოსა და ჩვენი ხალხის ბედი არ იქნება დამოკიდებული მერაბიშვილსა და უგულავაზე, ამას ვამბობ სრული პასუხისმგებლობით. ბატონი საირუშ ვოლსკის დღევანდელი საქციელი საერთოდ კრიტიკას ვერ უძლებს. ის, რასაც საირუშ ვოლსკი ამბობს, დღეს უკვე სატელევიზიო კომენტარებში, არის აბსოლუტური სიცრუე. მისი პირადი განწყობა, მისი პირადი პოზიცია და ჩვენმა მაყურებელმა ძალიან კარგად იცის, რომ ეს არ არის ევროპარლამენტის და ევროსტრუქტურების ოფიციალური პოზიცია. რაც არ უნდა მოინდომოს ბატონმა საირუშ ვოლსკიმ და ასე, მისნაირად ანგაჟირებულმა ჩვენმა ოპონენტებმა, ისინი თავიანთ საწადელს ვერ მიაღწევენ“, - განაცხადა კვაჭანტირაძემ.