მომავალი კვირიდან ბოტანიკურ ბაღთან დაკავშირებით, საპროტესტო აქციების განახლება იგეგმება. სამოქალაქო სექტორი და საკრებულოს ,,ნაციონალური მოძრაობა“ თბილისის ბოტანიკური ბაღის საზღვრების ცვლილებას აპროტესტებს.

"მიუხედავად იმისა, რომ ფინსერვისის საკუთრებაში არსებულ 10 ჰექტარზე, მათ შორის ბოტანიკური ბაღის 4 ჰექტარზე ბიძინა ივანიშვილს მშენებლობის ნებართვა არ ჰქონდა. ქუჩაში საპროტესტო აქციების გარდა ჩვენ სამართლებრივ გზებსაც მივმართავთ ბოტანიკური ბაღის დასაცავად,"- განაცხადა ირაკლი აბესაძემ. 

თბილისის ბოტანიკურ ბაღთან დაკავშირებით არასამთავრობო ორგანიზაციები კულტურის სამინისტროსგან დოკუმენტაციის გადაცემას ითხოვენ. აქტივისტები არ გამორიცხავენ, რომ დოკუმენტაციის შესწავლის შემდეგ სასამართლოს მიმართონ.

რაც შეეხება დედაქალაქის მერიის პოზიციას, აქ აცხადებენ, რომ ბოტანიკური ბაღის საკადასტრო საზღვრების კორექტირება განხორციელდა ბაღის ფართობის უცვლელად და კულტურული მემკვიდრეობის ძეგლის არეალისგან დამოუკიდებლად.

,,ბოტანიკურ ბაღს ძეგლის სტატუსი მიენიჭა 2007 წელს, თბილისის არქიტექტურის საქალაქო სამსახურის მიერ 2000 წელს დადგენილი პირობითი გეგმის მიხედვით, რაც მოიცავდა 81 ჰა ტერიტორიას და აღნიშნულ საზღვრებში არ შედის ის ფართობი, რომლის ცვლილებაც განხორციელდა.

ამასთან, ძეგლის მომიჯნავედ არსებული მიწის ნაკვეთების საზღვრების კონფიგურაციის ცვლილება არ განეკუთვნება კულტურული მემკვიდრეობის დაცვის საბჭოს უფლებამოსილებას, შესაბამისად, თბილისის მერიის მიერ საზღვრების კორექტირება განხორციელდა მოქმედი კანონმდებლობის სრული დაცვით და დადგენილი წესების შესაბამისად.

ზემოაღნიშნულის გათვალისწინებით, გარკვეული პოლიტიკური ჯგუფი ცდილობს თემის მანიპულირებითა და პოპულისტური განცხადებებით საზოგადოება შეცდომაში შეიყვანოს, რაც ჩვენთვის სრულიად მიუღებელია.

თბილისის მერია მოუწოდებს მოსახლეობას, ნუ აჰყვებიან მიზანმიმართულ პროვოკაციას, რათა საკითხის პოლიტიკური ინტერპრეტირებით არ დაზარალდეს თბილისის ბოტანიკური ბაღის ინტერესები და განვითარების პერსპექტივა”, - აცხადებენ მერიაში.