აშშ-ის სახელმწიფო მდივანი ჯონ კერი საქართველოს დამოუკიდებლობის დღეს ულოცავს. ჯონ კერის განცხადება სახელმწიფო დეპარტამენტის ვებგვერდზე გამოქვეყნდა. სახელმწიფო მდივანი აშშ-ის სახელით საქართველოს ტერიტორიულ მთლიანობას უპირობო მხარდაჭერას უცხადებს.

“26 მაისს ჩვენ აღვნიშნავთ აშშ-სა და საქართველოს შორის მეგობრული და სტრატეგიული პარტნიორობის 25 წლის იუბილეს”, - აღნიშნულია ჯონ კერის განცხადებაში.

სახელმწიფო მდივნის განცხადებით, ვაშინგტონი საქართველოს რეგიონში დემოკრატიული პროგრესის მაგალითად განიხილავს. მისი თქმით, ეს მიღწევა კიდევ უფრო თვალსაჩინოა საქართველოს ტერიტორიის 20 პროცენტის ოკუპაციის გათვალისწინებით.

“აშშ უპირობოდ უჭერს მხარს საქართველოს სუვერენიტეტსა და ტერიტორიულ მთლიანობას საერთაშორისოდ აღიარებულ საზღვრებში, ასევე ევროატლანტიკურ ინტეგრაცისკენ მის მისწრაფებებს”,  - ნათქვამია განცახდბაში.

ჯონ კერი ასევე მადლობას უხდის საქართველოს ავღანეთის განვითარებაში შეტანლი წვლილისათვის. სახელმწიფო მდივანი ვაშინგტონსა და თბილისს შორის თანამშრომლობის გაღრმავებაში დარწმუნებულია.

“ვულოცავ ქართველ ხალხს ამ საამაყო დღეს და ველი, რომ ჩვენი პარტნიორობა უსაფრთხო, დემოკრატიულ და დამოუკიდებელ საქართველოსთან უახლოეს წლებში კიდევ უფრო გაღრმავდება”, - ნათქვამია ჯონ კერის განცხადებაში.