დღეს, საქართველოს საგარეო საქმეთა მინისტრი მიხეილ ჯანელიძე ესტონეთის რესპუბლიკის თავდაცვის მინისტრს ჰანნეს ჰანსოს შეხვდა. ესტონელი მინისტრი საქართველოს თავდაცვისა და უსაფრთხოების რიგით მე-10 საერთაშორისო კონფერენციაში მონაწილეობის მისაღებად ეწვია.

შეხვედრაზე საქართველოს საგარეო საქმეთა მინისტრმა კმაყოფილებით აღნიშნა, რომ ორ ქვეყანას შორის მაღალი დონის პოლიტიკური დიალოგი არსებობს და ნაყოფიერია თანამშრომლობა სხვადასხვა სფეროში, ასევე აქტიურია ურთიერთობები თავდაცვის სამინისტროებს შორის. ჰანნეს ჰანსომ, თავის მხრივ, ასევე დაადასტურა, რომ ესტონეთი საქართველოსთან თავდაცვის სფეროში ურთიერთობების განვითარებას დიდ მნიშვნელობას ანიჭებს და დახმარებას უწევს ქართულ მხარეს სხვადასხვა მიმართულებით, მათ შორის კიბერ-უსაფრთხოების განვითარების კუთხით, სადაც ესტონეთი ერთ-ერთ წამყვან ქვეყანას წარმოადგენს.

შეხვედრაზე საუბარი შეეხო რეგიონში არსებულ უსაფრთხოების ვითარებას და ნატო-ს ვარშავის სამიტზე საქართველოსა და ესტონეთის მოლოდინებს. ჰანნეს ჰანსომ კიდევ ერთხელ დაადასტურა, რომ ესტონეთი კვლავაც საქართველოს მტკიცე მხარდამჭერად რჩება და შემდგომი დახმარება აღუთქვა ევრო-ატლანტიკური ინტეგრაციის გზაზე. მიხეილ ჯანელიძემ ჰანნეს ჰანსოს ასევე გააცნო ევროკავშირთან სავიზო ლიბერალიზაციის პროცესის მიმდინარეობა და იმედი გამოთქვა, რომ უვიზო მიმოსვლის შესახებ საბოლოო გადაწყვეტილება უახლოეს მომავალში იქნება მიღებული. შეხვედრაზე, აგრეთვე, მნიშვნელოვანი ყურადღება დაეთმო ოკუპირებულ ტერიტორიებზე არსებულ უსაფრთხოებისა და ჰუმანიტარულ ვითარებას, გამოწვევებსა და საფრთხეებს.