დარწმუნებული ვარ, „ქართული  ოცნების“ ახალი სახეები ძალიან დიდ წვლილს შეიტანენ ქვეყნის განვითარებაში, პროგრესში, ახალ ხედვებში,-აღნიშნული განცხადება ვიცე- პრემიერმა,  „ქართული ოცნება-დემოკრატიული საქართველოს“ გენერალურმა მდივანმა კახა კალაძემ ჟურნალისტებთან საუბრისას საგურამოში, ილია ჭავჭავაძის სახლ-მუზეუმში, პარტიის განახლებული შემადგენლობის წარდგენისას გააკეთა.

„პირველ რიგში, მინდა წარმატებები ვუსურვო დღეს წარდგენილ ადამიანებს. ეს ადამიანები შერჩეულები არიან თავიანთი პროფესიონალიზმით, პატიოსნებით, გამოცდილებით, ქვეყნის სამსახურში ყოფნით. დარწმუნებული ვარ, ძალიან დიდი წვლილს შეიტანენ ქვეყნის განვითარებაში, პროგრესში, ახალ ხედვებში და ა.შ.“,-აღნიშნა კახა კალაძემ.

რაც შეეხება საპარლამენტო სიის ფორმირების საკითხს, როგორც კახა კალაძემ ჟურნალისტების კითხვის საპასუხოდ განმარტა,   სიაზე მუშაობა გრძელდება და უახლოეს მომავალში ყველაფერი იქნება ცნობილი.

„მესმის, რომ ძალიან გაინტერესებთ, ზოგადად, საინტერესოა თუ ვინ იქნება პარტია „ქართული ოცნება-დემოკრატიული საქართველოს“ საპარლამენტო სიის შემადგენლობაში, ვინ იქნებიან მაჟორიტარი დეპუტატობის კანდიდატები. ამ ყველაფერს თქვენ დროთა განმავლობაში გაიგებთ.  ეს ყველაფერი არის საარჩევნო კამპანიის ნაწილი და შესაბამისად, ყველა ინფორმაცია, ყველა ჩვენს გადაწყვეტილებაზე, თქვენთვის და საზოგადოებისთვის აუცილებლად იქნება ცნობილი“,-აღნიშნა პარტიის გენერალურმა მდივანმა.