პრემიერ-მინისტრის გიორგი კვირიკაშვილის განმარტებით, თავდაცვის მინისტრის პოსტზე, რომელიც მალე ვაკანტური იქნება, კონსულტაციები ჯერ კიდევ გრძელდება. თუმცა როგორც გიორგი კვირიკაშვილმა აღნიშნა, ამ პოსტზე ირაკლი სესიაშვილისა და კახა კახიშვილის კანდიდატურები არ განიხილება.

"გრძელდება კონსულტაციები, მაგრამ არა ამ ორ კანდიდატთან დაკავშირებით. ირაკლი სესიაშვილი არის ძალიან ღირებული იქ, სადაც მოღვაწეობს. სავარაუდოდ, ის იქნება მაჟორიტარობის კანდიდატი. რაც შეეხება კახა კახიშვილს, ის არის ძალიან კარგი სასჯელაღსრულებისა და პრობაციის მინისტრი და ვფიქრობ, მისი გამოცდილება ძალიან ღირებულია იქ, სადაც დღეს მუშაობს"- განაცხადა მთავრობის მეთაურმა.

შეგახსენებთ, რომ მედიაში გავრცელებული ინფორმაციით, თავდაცვის მინისტრის თანამდებობაზე სოფლის მეურნეობის მოქმედი მინისტრის, ოთარ დანელიას კანდიდატურა განიხილება.