საკონსტიტუციო სასამართლოს თავმჯდომარის გიორგი პაპუაშვილის სკანდალურ განცხადებაზე საუბრობენ უმრავლესობის წევრები. საქართველოს შრომის, ჯანმრთელობისა და სოციალური დაცვის მინისტრის დავით სერგეენკოს თქმით, პრემიერ მინისტრისგან სწრაფი რეაგირება იძლევა საფუძველს, რომ ეს ინფორმაცია იქნება სწრაფად და ობიექტურად გამოძიებული.

"საკონსტიტუციო სასამართლოს თავმჯდომარის განცხადება მართლაც ძალიან საყურადღებოა. ასევე საყურადღებოა ისიც, რომ ძალიან მოკლე პერიოდში, საათზე ნაკლები დროის განმავლობაში, პრემიერმინისტრმა გააკეთა ამაზე რეაგირება. ვფიქრობ, რომ ასეთი მყისიერი რეაგირება არის იმის გარანტი, რომ პოტენციურად საყურადღებო და შეიძლება საფრთხის შემცველი ინფორმაცია იყოს ბოლომდე და ობიექტურად გამოკვლეული“ - განაცხადა სერგენკომ.

საქართველოს ფინანსთა მინისტრის ნოდარ ხადურის თქმით, საქართველოში სასამართლო ისეთი დამოუკიდებელია, როგორც არასდროს.

"მე მაინც ღრმად ვარ დარწმუნებული, რომ საქართველოში სასამართლო ისეთი დამოუკიდებელია, როგორიც არ ყოფილა არასოდეს, მათ შორის საკონსტიტუციო“ - აღნიშნა  ხადურმა.

პარლამენტის ფრაქცია რესპუბლიკელების თავმჯდომარის მოადგილის თამარ კორძაიას თქმით, ყველა სახელისუფლებო რესურსი უნდა იყოს მიმართული ამ საქმის გამოძიებაზე.

"მთელი სახელისუფლებო რესურსი ამაზე უნდა იყოს კონცენტრირებული. საკონსტიტუციო სასამართლოს თავმჯდომარე და საკონსტიტუციო სასამართლოს მოსამართლე არის ერთ-ერთი ყველაზე მაღალი იმუნიტეტის მქონე ადამიანი ქვეყანაში და როდესაც მის მიმართ შეიძლება ასეთი ტიპის დანაშაულს ჰქონდეს ადგილი, ეს არის განგაშის საფუძველი“ - განაცხადა კორძაიამ.

წყარო: Rustavi 2