სამოქალაქო ავიაციის სააგენტოსა და „Eurocontrol”-ს სამუშაო შეხვედრა შედგა. სააგენტოს ინფორმაციით, აღნიშნული შეხვეხდრის მიზანს, სამოქალაქო ავიაციის სააგენტოს ხელშეწყობის თაობაზე, ევროკონტროლთან, 2011 წლის 11 ოქტომბერს ხელმოწერილი შეთანხმებით გათვალისწინებული ღონისძიებების მიმდინარეობის შეჯამება, განხილვა და სამომავლო გეგმების განსაზღვრა წარმოადგენდა.

პროექტის ძირითადი მიმართულებების განხილვის გარდა, შეხვედრა მნიშვნელოვანი იყო, იმითაც, რომ მიმდინარე წლის აპრილში, ევროკონტროლის სათავო ოფისში მიღწეული შეთანმხების შედეგად, სამოქალაქო ავიაციის სააგენტოსთან ერთად, მიმდინარე პროექტში ჩაერთო სააერნაოსნო მომსახურების საწარმო შპს „საქაერონავიგაცია“, რომლის წარმომადგენლებიც ამ რანგში პირველად დაესწრნენ შეხვედრას. ასეთი სახის თანამშრომლობით უფრო ეფექტურად გაგრძელდება სააერნაოსნო მომსახურების სფეროში ევროპული სტანდარტების დანერგვა, რაც გამოიხატება საქაერონავიგაციის მხრიდან საქართველოს საჰაერო სივრცის მომხმარებლისთვის უფრო უსაფრთხო და ეფექტური მომსახურების მიწოდებაში, ხოლო სააგენტოს მხრიდან ასეთი მომსახურების ეფექტურ რეგულირებასა და ზედამხედველობაში.

სწორედ სააერნაოსნო მომსახურების საწარმოსა და მისი სასწავლო ცენტრის მიმართ წაყენებულ ევროპულ სასერტიფიკაციო მოთხოვნებზე და მათ ეროვნულ საავიაციო კანონმდებლობაში დანერგვასთან დაკავშირებულ საკითხებზე საუბარს დაუთმეს ექსპერტებმა შეხვედრის შემდეგი ნაწილი. „საქაერონავიგაციის“ წარმომადგენლებმა, უცხოელი სპეციალისტებისაგან მოისმინეს პასუხები, მათთვის საინტერესო კითხვების ირგვლივ.

შეხვედრა აგრეთვე, წარმოადგენდა კარგ შესაძლებლობას სააგენტოს და საქაერონავიგაციის სპეციალისტებისათვის, გაემართათ კონსულტაციები ევროპელ პარტნიორებთან საჰაერო მოძრაობის მეთვალყურეების მომზადება/გადამზადებისა და საქაერონავიგაციის ევროპული სტანდარტების მოთხოვნების შესაბამისად რესერტიფიცირების პროცესის ირგვლივ.

ევროპის საჰაერო ნავიგაციის უსაფრთხოების ორგანიზაციის (EUROCONTROL) პროექტი სამოქალაქო ავიაციის სააგენტოს ხელშეწყობის თაობაზე მიზნად ისახავს ქართული მხარის დახმარებას, ზედამხედველობის ხარისხის ამაღლებისა და მისი ევროპის ერთიანი საჰაერო სივრცის კანონმდებლობასთან შესაბამისობაში მოყვანის კუთხით.