ამერიკის ოჰაიოს შტატის ხელისუფლებამ ყველა სასიკვდილო განაჩენის სისრულეში მოყვანა 2017 წლამდე გადადო. როგორც BBC-ი იტყობინება, შტატმა სასიკვდილო ინექციისთვის პრეპარატების შეძენა ვერ მოახერხა.

2017 წლის დადგომამდე სისრულეში უნდა მოეყვანათ 12 სასიკვდილო განაჩენი. თუმცა სიცოცხლე იმ 25 მსჯავრდებულსაც გაუხანგრძლივდება, რომლებიც 2017 წლის იანვრის შემდეგ უნდა დასჯილიყვნენ.

სასიკვდილო ინექციების მიწოდებაში შეფერხება რიგი კომპანიების მხრიდან ამ ნივთიერებების გაყიდვაზე უარმა გამოიწვია. ეს კი ცალკეული შტატების ხელისუფლებას აიძულებს მიმართოს სასჯელის სხვა ფორმებს. იუტას შტატში ხელისუფლებამ დახვრეტის ნებართვა გასცა. ოკლაჰომაში გაზის კამერები გაიხსენეს. ნებრასკას შტატმა კი სიკვდილით დასჯაზე უარის თქმა გადაწყვიტა.

დღეს სიკვდილით დასჯა ამერიკის 31 შტატშია ნებადართული.