სულ მცირე 17 ადამიანი დაიღუპა და 30-ზე მეტი დაიჭრა ერაყში საქორწინო ცერემონიის დროს მომხდარი აფეთქებისას. გავრცელებული ინფორმაციით, თვითმკვლელმა დანაღმული ავტომობილი ააფეთქა.

თავდასხმა ქალაქ ფალუჯადან 30 კმ-ში მოხდა. მომხდარზე პასუხიმგებლობა ამ დრომდე არცერთ დაჯგუფებას არ აუღია. მანამდე ერაყში მშვიდობიან მოსახლეობაზე თავდასხმებს ”ისლამური სახელმწიფოს” მებრძოლები ახორციელებდნენ. არ არის გამორიცხული რომ ბოლო ტერაქტის უკან ეს ექსტრემისტული დაჯგუფება დგას.

ბოლო ერთი თვის განმავლობაში მებრძოლებმა ერაყსა და სირიაში 2014-2015 წლებში დაკავებული ტერიტორიების 28 პროცენტი დაკარგეს. 17 ოქტომბრიდან მოსულის გათავისუფლების ოპერაცია მიმდინარეობს, მასში ჩართულნი არიან ერაყის არმია, ქურთთა ”პეშმერგას” შენაერთები და საერთაშორისო ანტიტერორისტული კოალიცია აშშ-ის ხელმძღვანელობით. როგორც ერაყის ხელისუფლება ამბობს, მოსულის გათავისუფლება ქვეყანში ”ისლამური სახელმწიფოს” ფაქტობრივ განადგურებას მოასწავებს.