ფასანაურთან ჩარჩენილი 300-მდე ტრაილერისა და სავარაუდოდ 3 გარდაცვლილის შესახებ ინფორმაციას ,,რუსთავი 2“ ავრცელებს. ტელეკომოანიის ინფორმაციით, ფასანაურთან საკვების, ფულის და საწვავის გარეშე ჩარჩენილი მძღოლები და მგზავრები ხელისუფლებას დახმარებას სთხოვენ. მათი თქმით ადგილზე საკმაოდ მძიმე მდგომარეობაა და მათ ყურადღებას არავინ აქცევს.

ვრცელდება ინფორმაცია, რომ მძიმე პირობების გამო ერთ-ერთი ტრაილერის მძღოლიც გარდაიცვალა.

„300-მდე მანქანა მეათე დღეა გაჭედილია, არც საკვები გავქვს და ფულიც გვითავდება. ადგილობრივები პროდუქტს ძალიან ძვირად ყიდიან. პოლიცია არ გვიშვებს იმიტომ რომ გზები არაა გაწმენდილი. მანქანები ორივე მიმართულებით მოძრაობს ჩვენ კი მეათე დღეა არ ვიძვრებით. როგორც ამბობენ 3 ადამიანი გარდაიცვალა აქედან 1 გულის შეტევით,“- აცხადებს ერთ-ერთი მძროლი ალექსანდრ მაქსიმოვი.

სოფელ ნადიბანთან არსებულ ვითარებაზე კომენტარს აკეთებს საქართველოს საავტომობილო გზების დეპარტამენტის თავმჯდომარე გიორგი სეთურიძე. ის რუსეთის მოქალაქის გარდაცვალების ფაქტს ადასტურებს, თუმცა აცხადებს, რომ ასეთი მხოლოდ 1 შემთხვევა დაფიქსირდა.

„ჩვენი ტექნიკა 24 საათიან რეჟიმში წმინდავს. სატვირთო ავტომობილები და მსუბუქი ავტომობილები გადაადგილდება. გამომდინარე იქიდან რომ მისაბმელიანი ავტოტრანსპორტისათვის შეუძლებელია იქ ასვლა და უსაფრთხოების ნორმებიდან გამომდინარე არ შეიძლება მათი იქ დაშვება, პატრული მათ არ ატარებს,“-აცხადებს სეთურიძე.

გიორგი სეთურიძე გარდაცვალების ფაქტსაც ადასტურებს, თუმცა აცხადებს, რომ მხოლოდ ერთი მძღოლი გარდაიცვალა გულის შეტევით, რომელიც რუსეთის მოქალაქე იყო და ის ექსპერტიზაზეა გადასვენებული.