ქუთაისის საკრებულოს თავმჯდომარის ინიციატივით, სოფო ბობოხიძის სახელობის ყოველწლიური საქველმოქმედო აქცია დაწესდება. წელს აქცია 22 წლის გოგონას, თამუნა მორგოშიას დასახმარებლად გაიმართა. 

”ახლახანს გარდაცვლილი ჟურნალისტისა და ოპერატორის სოფო ბობოხიძის სახელობის საქველმოქმედო აქცია ყოველწლიურად გაიმართება, - ამის შესახებ ქუთაისის საკრებულოს თავმჯდომარე დავით დვალმა მისივე ორგანიზებულ საქველმოქმედო ღონისძიებაზე განაცხადა. 
აქციაში ჩაერთვნენ - ქუთაისის მერი შოთა მურღულია, მაჟორიტარი დეპუტატების კობა ნარჩემაშვილის, დიმიტრი მხეიძის, გენადი მარგველაშვილის წარმომადგენლები, საკრებულოს თავმჯდომარის მოადგილეები ბექა ყანჩელი, ნიკა ლატარია და კერძო სექტორის წარმომადგენლები. 

საჯარო მოხელეთა მხრიდან ქველმოქმედების აუცილებლობაზე გაამახვილა ყურადღება ქუთაისის მერმა შოთა მურღულიამ. მისი თქმით, აუქციონზე შეგროვებული თანხის გარდა, თამუნა მორგოშიას ოჯახს ის თანხაც გადაეცემა, რომელიც მერიის წარმომადგენლებმა მის დასახმარებლად გაიღეს. 
ქუთაისის საკრებულოს თავმჯდომარის განცხადებით, სიცოცხლის გადასარჩენად მსგავსი ტიპის ღონისძიება ქუთაისში ყოველწლიურად გაიმართება. 

როგორც დვალმა აღნიშნა, ღონისძიება საზოგადოებრივი მაუწყებლის ოპერატორის, აწ გარდაცვლილი სოფო ბობოხიძის სახელობის იქნება, ხოლო ადამიანს, ვისაც დახმარება სჭირდება, ჟურნალისტები შეარჩევენ. აუქციონზე 22 წლის თამუნა მორგოშიას დასახმარებლად 6 000 ლარამდე თანხა შეგროვდა. ცნობისთვის, აფხაზეთიდან დევნილ, 22 წლის თამუნა მორგოშიას დახმარება ესაჭიროება. მას ოსტეობლასტოკლასტომა - ქვედა ყბის სიმსივნე აღმოაჩნდა.