ფილიპინების პრტეზიდენტმა როდრიგო დუტერტემ აღიარა, რომ ნარკორტიკების გამავრცელებლებს პირადად კლავდა. ასეთი განცხადება მან ადგილობრივი ბიზნესის წარმომადგენლებთან შეხვედრაზე გააკეთა. შეხვედრაზე ნარკოტიკებთან ბრძოლის მეთოდებიც განიხილეს, რომელსაც ფილიპინების პოლიცია იყენებს. სამართალდამცველების სტატისტიკით, 2016 წლის ივლისიდან ანტინარკოტიკული კამპანიის დროს 5 ათასამდე ადამიანია მოკლული.

დუტერტემ ქალაქ დავაოს მერის პოსტზე მუშაობის დროს ნარკომაფიასთან ბრძოლის საკუთარ გამოცდილებაზეც ისაუბრა. ”დავდიოდი დავაოში მოტოციკლით, უბრალოდ ვპატრულირებდი ქუჩებში, ვეძებდი პრობლემებს, რათა მოკვლის შესაძლებლობა მქონოდა”, - განაცხადა დუტერტემ.

პრეზიდენტმა მკაცრი მეთოდების გამო  უფლებადმცველებისა და ბარაკ ობამას შეფასებების საპასუხოდ აღნიშნა, რომ კრიტიკის გამო ანტინარკოტიკული კამპანიის შეწყვეტას არ აპირებს.

სექტემბერში ფილიპინელმა ყოფილმა დაქირავებულმა მკვლელმა ედგარ მატობატომ განაცხადა, რომ როდრიგო დუტერტე დავაოს მერად ყოფნის დროს სასამართლოს გარეშე დამნაშავეებისა და თავისი ოპონენტების მკვლელობის ბრძანებებს იძლეოდა. მისი თქმით, მსგავსი ანგარიშსწორების შედეგად ათასამდე ადამიანი მოკლეს. მაშინ თავად დუტერტემ მკველობებთან კავშირი კატეგორიულად უარყო.