„თიბისი ბანკის“ სამეთვალყურეო საბჭოს თავმჯდომარე მამუკა ხაზარაძე აცხადებს, რომ საქართველოს ეკონომიკისთვის 2017 წელი წარმატებული იქნება. ამის შესახებ ხაზარაძემ ჟურნალისტებს ლარის კურსთან დაკავშირებით დასმული კითხვის საპასუხოდ განაცხადა. 

„ვფიქრობ, ყველაფერი კარგად იქნება, დარწმუნებული ვარ იმაში, რომ 2017 წელი იქნება ეკონომიკაში წარმატებული. ჩვენ ძალიან ოპტიმისტურად ვართ განწყობილები. 2017 წელს ველოდებით სერიოზულ განვითარებას, ბევრი პროექტია დაძრული სხვადასხვა მიმართულებით და კიდევ ერთხელ ვადასტურებ, რომ იქნება სიმშვიდე და კარგი წინსვლა“, - განაცხადა მამუკა ხაზარაძემ. 

მამუკა ხაზარაძე აღნიშნავს, რომ „თიბისი ბანკი“ მზად არის სესხების გალარებასთან დაკავშირებული პროცესისთვის.  

„ვფიქრობ, რომ ეს ძალიან კარგია მთლიანად ეკონომიკისთვის, ლარის განვითარებისთვის, იმიტომ რომ ჩვენ უნდა დავიწყოთ აზროვნება ლარში და რა თქმა უნდა ძალიან კარგია იმ ადამიანებისთვის, ვისაც ლარში აქვს შემოსავალი და მათ აღარ ექნებათ საფიქრებელი, რომ დოლარის კურსის გამო გაეზრდებათ გადასახადი. ეს ერთხელ და სამუდამოდ დამთავრდება. მე მგონი ეს კარგი ინიციატივაა“, - განაცხადა მამუკა ხაზარაძემ.