თურქმა პოლიციელმა მევლუთ მერთ ალთინთაშმა, რომელმაც რუსი დიპლომატი მოკლა, თავდასხმის დღეს ანკარის თანამედროვე ხელოვნების გალერეასთან მდებარე სასტუმროში ნომერი იქირავა.

გაზეთ Hurriyet-ის ცნობით, ალთინთაში ერთი დღით სამსახურიდან გათავისუფლდა. სასტუმროში ნომერი დაჯავშნა, რათა თავდასხმა დაეგეგმა. ის სამოქალაქო ტანსცმლით გალერეაში მივიდა, სადაც პოლიციელის დამადასტურებელი მოწმობის წარდგენის შემდეგ დაუბრკოლებლად მოხვდა. მან ელჩს სიტყვით გამოსვლის დროს ზურგში რამდენჯერმე ესროლა. ელჩის გარდა დაიჭრა კიდევ სამი ადამიანი. სპეცრაზმმა დამნაშავის ლიკვიდაცია განახორციელა.

გამოცემის ინფორმაციით, მკვლელობასთან კავშირისთვის დაკავებულთა რაოდენობა 6-მდე გაიზარდა. დედისა და მეუღლის გარდა ასევე დააკავეს მკვლელის ბიძა, რომელიც თურქეთში გადატრიალების მცდელობის შემდეგ დაპატიმრებული იყო, თუმცა მოგვიანებით გათავისუფლდა.