„ცენტრ პოინტის“ დამფუძნებლის მაია რჩეულიშვილის ადვოკატები დღეისათვის ჩანიშნული სასამართლო პროცესის გადადებას ითხოვენ. ადვოკატების განმარტებით, რჩეულიშვილი ითხოვს, რომ პროცესი მისი მონაწილეობის გარეშე არ ჩატარდეს.

მარიამ ცუცქირიძე ასევე აცხადებს, რომ გუშინ, დღის პირველ ნახევარში, მაია რჩეულიშვილის ჯანმრთელობის მდგომარეობა გაუარესდა. რა დროსაც მან დაწერა განცხადება იმის შესახებ, რომ თანახმა იყო, პროცესი მისი მონაწილეობის გარეშე ჩატარებულიყო, რათა არ მომხდარიყო სპეკულაციები პროცესის გაჭიანურებაზე, თუმცა დღის მეორე ნახევარში მაია რჩეულიშვილის მდგომარეობა გაუმჯობესდა და მან მეორე განცხადება დაწერა, რომლითაც ის ითხოვს, რომ პროცესი მისი მონაწილეობის გარეშე არ ჩატარდეს.

,,ეს განცხადება გადაეცა ციხის ადმინისტრაციას, რომელსაც სასამართლოსთვის უნდა გადაეგზავნა, თუმცა, როგორც გავარკვიეთ, მეორე განცხადება სასამართლოში შესული არ არის. ჩვენ მოვახსენებთ სასამართლოს მაია რჩეულიშვილის პოზიციას და სასამართლო იმსჯელებს, გადადოს თუ არა დღევანდელი პროცესი იქამდე, სანამ მაია რჩეულიშვილი არ შეძლებს პროცესში მონაწილეობის მიღებას“, - განმარტა ადვოკატმა.