თბილისის მერმა დავით ნარმანიამ ზედამხედველობის სამსახურს კომპანიების მიერ შესრულებული სამუშაოების მონიტორინგი დაავალა.

როგორც დღეს, მთავრობის სხდომაზე თბილისის მერმა აღნიშნა, გარკვეულ კომპანიებს დადგენილ ვადებში შესაბამისი სამუშაოების შესრულება უგვიანდებათ, რაც სამართლიანად იწვევს მოსახლეობის უკმაყოფილებას.

დავით ნარმანიამ ზედამხედველობის სამსახურს დავალება მისცა, შეისწავლოს ყველა მსგავსი შემთხვევა და გატარდეს შესაბამისი ზომები.

„ბოლო პერიოდში განსაკუთრებით გახშირდა სხვადასხვა ქუჩების, მოედნების, სკვერების თვითნებურად გადათხრის ფაქტები. არის შემთხვევები, როდესაც კონტრაქტორებს აქვთ ნებართვები, თუმცა უგვიანდებათ ცალკეულ კომპანიებს დადგენილ ვადებში შესაბამისი სამუშაოების შესრულება, რაც სამართლიანად იწვევს მოსახლეობის უკმაყოფილებას. აქედან გამომდინარე, თბილისის მერიის ზედამხედველობის საქალაქო სამსახურს ვავალებ, რომ რაიონული სამსახურების მეშვეობით, რაც შეიძლება დროულად შეისწავლოს ყველა მსგავსი შემთხვევა, მოგვაწოდოს წინადადებები და ნორმების დაცვით გავატაროთ პასუხიმგებლობასთან დაკავშირებული ზომები“, - განაცხადა დავით ნარმანიამ.

თბილისის მერის თქმით, კომუნიკაციის გაყვანისა და საინჟინრო ქმედებების განხორციელებისათვის შესაბამისი ნებართვა გაიცემა, თუმცა სამუშაოები დროულად უნდა შესრულდეს.

„ვფიქრობ, რომ ამ მიმართულებით შესაბამისი ცვლილებები აუცილებლად უნდა გავატაროთ და უფრო მეტად უნდა გავამკაცროთ ქალაქში არსებული მდგომარეობა. ნებისმიერი სამუშაო, რომელიც აუცილებლად არის ჩასატარებელი, რა თქმა უნდა, ჩვენი მხრიდან ადეკვატურად იქნება ნაპასუხები, ანუ მიეცემა ნებართვა, თუმცა სამუშაო, რაც ითვალისწინებს კომუნიკაციის გაყვანას ან საინჟინრო ქმედებების განხორციელებას, აუცილებლად დროულად უნდა ჩატარდეს“, - განაცხადა დავით ნარმანიამ.